Diretór Jerál Sekretaria Estadu Formasaun Profesionál no Empregu (SEFOPE), Paulo Alves, hateten, traballadór balun halai sees ona husi sistema ne’ebé SEFOPE determina ona.
“Agora Austrália nian hanesan ita hatene katak 116 pesoas mak sees tiha ona husi sistema ne’e mak hanesan ha’u hatete, ita-nia programa atu ba servisu iha Austrália ne’e liu-liu iha sistema programa servisu sazonál durasaun kontratu fulan 6, programa PLS durasaun husi tinan ida to’o tinan tolu, maioria sira halai sees husi sistema ne’e PLS ninian de’it, agora ami mós halo hela enkontru kada fulan, kada vez semana rua ne’ebé envolve mós ita-nia reprezentante embaixadór Timor-Leste iha Camberra ne’ebá no mós ekipa ki’ik oan toma konta iha Darwin, atu bele monitoring no tau matan ba movimentu traballadór sira halo“,Diretór Jerál SEFOPE ba GMN foin la-lais ne’e iha ninia kna’ar fatin edifísiu SEFOPE, Caicoli, Díli.
Paulo akresenta, situasaun pandémia COVID-19 ne’ebé dau-daun sai ameasa iha mundu, nune’e halo atividade servisu sira paradu no rendimentu ba empreza tun no movimentu aéreo ba rai-liur paradu.
“Razaun husi alin sira ne’e sees husi sistema hanesan ita hotu hatene sira atravesa situasaun pandémia COVID-19, tuir loloos ne’e sira fila hotu ona, maibe tanba fulan 6 foin lockdown, entaun patraun fó tan fulan 3 tan ba sira hodi servisu fali iha fatin seluk, maibé hanesan ita hatene ai-fuan ne’e iha nia tempu de’it, sé nia tempu liu ona ne’e sira tenke fila-fali mai Timor no rendimentu ladun di’ak fo razaun forte ba sira atu sees husi sistema”, hateten Diretór Jerál SEFOPE ne’e.
Dau-daun ne’e Governu Timor-Leste liu husi SEFOPE buka ona meius, hodi rezolve traballadór hirak ne’ebé halai sees ona sistema programa servisu sazonál iha Austrália.
Entretantu tuir informasaun husi SEFOPE iha loron 21, fulan Agostu, Primeiru Ministru Austrália deklara ona atu reabertura prosesu servisu programa sazonál ba Timor-Leste, inklui nasaun sira illa pasífiku, nune’e SEFOPE bele halo ona preparasaun, hodi haruka traballadór ba servisu iha Austrália. lia
