Tensaun polítika ne’ebé oras ne’e dadaun la’o iha rai laran, komunidade Aldeia Lalika, suku Betano, postu Administrativu Same, Munisípiu Manufahi, husu ba líder partidu polítiku 5 (PLP, CNRT, Fretilin, PD no Khunto), ne’ebé hetan asentu iha Parlamentu Nasional atu bele díalogu hodi hetan konsensu ba ukun iha periodu tinan 2017-2022.
“Ami povu ki’ik hakarak hakmatek hodi hala’o ami-nia servisu nu’udar agrikultor nian, husu ba polítika nain sira tenke fo liman ba malu, tenke rona malu, no labele hadau malu kadeira, tau interese povu no nasaun nian aas liu, labele tau interese privadu no partidaria mak bo’ot,”hateten Boncel Nunes ba GMN iha Betano, Sábadu (04/11/2017).
Komunidade ne’e mós garante, polítika nain sira sei tau aas interese povu no nasaun, hodi responde povu nia halerik ba preokupasaun ne’ebé mak povu barak infrenta iha baze.
“Ita espera katak ita nia polítika nain sira, sei responde povu ki’ik nia halerik konaba necessidade bázika, hanesan bee moos, estrada no eletrisidade ne’ebé barak seidauk bele asesu, no kontinua iha nakukun laran, no dezenvolvimentu ne’ebé diak to’o iha povu hotu nia bairo atu bele sente ukun an nia benefisiu,”katak Boncel.
Sorin seluk, Domingas da Costa nu’udar komunidade Aldeia Raifusa, Suku Betano, hatete, polítika nain hotu sei hakru’uk no la’o tuir regra konstituisaun RDTL nian.Say
