Iha sábadu loron 17 Novembru ne’e, Ministru Obras Públika (MOP), Salvadór Pires ho Ministru Estadu Prezidénsia Konsellu Ministru (MEPKM), Agio Pereira, inaugura primeira auto estrada, suai liga ba Fatukai-Zumalai ho nia naruk kilómentu 30.3, ne’ebé gasta orsamentu hamutuk millaun USD 304.
“Ha’u hakarak hato’o ha’u nia agradesimentu profunda liu-liu ba V Governu konstitusional no maun boot Xanana Gusmão ba ninia vizaun hodi ínisia planeamentu no implementasaun projetu ida ne’e, inklui entidade relvante sira seluk”,Salvador Pires liu husi ninia diskursu iha serimonia inagurasaun auto estrada Suai-Zumalai, Sabadu (17-11-2018).
Nia esplika, MOP iha kompromisu sei oferese lideransa forti no nesesariu atu koordena di-diak ho instituisaun relevante, atu kooperano toma responsabilidade atu auto estrada ida ne’e bele oferese sustentabilidade no funsaun máxima.
“Informa ba komunidade Suai katak MOP hetan ona autorizasaun husi Konsellu Ministru (KM) atu konstrui tan pasajen tráfiku 2 iha suku Matai no Holbelis, liu husi kompaña internasional China Overseas Engineering Company-China Railway First Group Joint Venture (COVEC-CRFG JV)”, dehan MOP ne’e
Nia akresenta, auto estrada ne’e liga dalan husi área tasi ibun sudeste ho dalan nasional no sei promove funsaun no objetivu signifikante, hanesan ba dezenvolvimentu infraestrutura petróleu, aselera dezenvolvimentu jeral iha área tasi ibun, mellora distribuisaun sasan iha futuru sentru área dezenvolvimentu iha koridor Suai, Betano, Beaço no distribui produtu agrikola no industrial ba merkadu lokal no internasional.
Husi sorin seluk tuir MEPKM, Agio Pereira, hateten, auto estrada ida ne’e marka tan pasu importante ida ba dezenvolvimentu infraestrutura rodaviáriu Timor-Leste.
Auto estrada hetan bensaun husi, amu sebastião no asisti husi membru Governu , Xefe Estadu Maior Jeneral F-FDTL, Major Jenerál Lere Anan Timur, Korpu Diplomátiku balun no entidade sira seluk.
Entretantu auto estrada husi postu administrativu Suai liga ba Fatukai-Zumalai ne’e kaer husi kompaña internasional COVEC-CRFG JV, hahú konstrusaun iha loron 25 janeiru 2016 no remata iha loron 7 Outubru, tinan ne’e. ves
