Orsamentu Jerál Estadu (OJE) tinan 2021 ne’ebé aloka ba Rejiaun Administratrivu Espesiál Oe-Cusse Ambeno (RAEOA) prioridade ba programa prevensaun ba pandémia COVID-19, tanba Oe-Cusse nu’udár rejiaun ne’ebé distánsia besik ho Nusa Tenggara Timur (NTT), Indonézia, tanba ne’e bele fó risku mós ba Timor-Leste.
Ho orsamentu ne’e, Prezidente Autoridade RAEOA, Arsenio Paixão Bano, hateten, OJE 2021 ne’ebé Governu prevé hodi aloka ba RAEOA, sei prioritiza ba programa prevensaun COVID-19, kontinuasaun infraestrutura ne’ebé prezidente anterior husik hela no mós programa seluk tan.
“Iha RAEOA ami hasoru situasaun COVID-19, ita boot sira hatene katak, Oe-Cusse hanesan iha rai-ketan NTT, iha suku no aldeia balun besik iha fronteira no eskola sira balun, fasilidade públika balun mak besik loos fronteira no ligasaun mós ho direitu populasaun”, Prezidente Autoridade RAEOA ne’e ba jornalista sira iha Parlamentu Nasionál (PN), Tersa (10/11/2020).
Arsenio akresenta, sira sei kontinua atividade atendimentu públiku sira iha eskola sira, transporte aeronáviu, transporte marítima ne’ebé paradu, tanba mosu pandemia COVID-19.
“Ami tenke prepara COVID-19 ne’e sai hanesan prioridade, tanba bainhira akompañia situasaun iha nasaun viziñu Indonézia kontinua rejista númeru COVID-19 kontinua aas, tanba ne’e RAEOA tenke kuidadu-an ”, haktuir Prezidente Autoridade RAEOA ne’e.
Entretantu OJE tinan 2021 Governu sentral propoin tokon USD 127.000.000 ba RAEOA ne’ebé sei koloka ba saláriu no vensimentu USD 11.072.049, bens servisu USD 23.775.569, kapitál menor USD 2.360.470, kapitál dezenvolvimentu USD 85.506.102 no transferénsia públika USD 4.285.810.
Kona-bá saláriu vensimentu hamutuk USD 11,072,049 ba funsionáriu hamutuk na’in 2,474 ne’ebé dezagrega iha Gabinete Prezidente autoridade, Adjunta Prezidente ba Asuntu Sosiál no Sekretáriu Rejionál na’in hitu iha RAEOA.
Alende ne’e, Arsenio husu mós ba Governu prevé tan millaun USD 14, hodi finaliza kontrusaun Ró Haksolok. Saláriu ba iha despeza ba kategória bens servisu hamutuk USD 23, 775, 569 hodi asegura ba kustu operasionál ba gabinete Prezidente Autoridade, Adjunta Prezidente Autoridade no Sekretáriu Rejionál sira hodi implementa programa iha RAEOA. mir
