GMN TV Politika Estadu TL kondekora Dom Basílio ho Colar Ordem TL

Estadu TL kondekora Dom Basílio ho Colar Ordem TL

170 views

Estadu Timor-Leste (TL), liu husi Prezidente Repúblika (PR) Francisco Guterres Lú Olo kondekora Bispu Dioseze Baucau, Dom Basílio do Nascimento ho medalla Colar Ordem Timor-Leste, ho títulu póstumu.

“Estadu rekoñese kontribuisaun Dom Basílio nian iha luta ba auto-determinasaun povu Timor-Leste. Saudozu ne’e kontribui ba luta libertasaun nasionál liu husi enkontrus sekretas ho lider frente armada. Dom Basílio do Nascimento lidera Igreja iha tempu okupasaun Indonézia nian la’os buat fásil ho konflitu oioin entre katólikus sira,” sita iha komunikadu ne’ebé GMN asesa husi pájina ofisiál Prezidensia Repúblika nian.

Dekretu-Lei númeru 20/2009, 6 Maiu, mak kria Ordem de Timor-Leste, atu hatudu rekoñesimentu TL nian ba sidadaun nasionál no estranjeiru, iha sira-nia serbisu kontribui ba benefísiu TL, Timor-oan ka umanidade.

Igreja Katóliku sempre asume ho dignidade sofrimentu povu tomak ninian, hamri’ik iha povu nia sorin defende direitu báziku sira. konstituisaun rekoñese papél Igreja nian iha luta libertasaun nasionál no hafoin restaurasaun independénsia.

Estadu TL rekoñese no valoriza individu no institusoins, iha rai-laran no tasi-balun, inklui membru kleru, tanba sira-nia kontribuisaun ba luta libertasaun povu no iha prosesu dezenvolvimentu.

Dom Virgílio: Dom Basílio aman ba ema hotu

Arcebispo Arque Dioseze Díli, Dom Virgílio da Silva do Carmo, SDB hatete, sarani hotu sente hakfodak tanba lakon aman no bibi-atan di’ak ida Dom Basílio do Nascimento, ne’ebé durante tinan 24 hamutuk ho sarani sira.

“Ita ida-idak sente, ita iha proximidade ida ho Dom Basílio, se ita la sente ida ne’e karik ita hakmatek iha ita nia fatin aban mak ita ba deit, maibé lae ita sente katak iha buat ruma, ita-nia amizade ne’ebé ita kria ho nia uainhira ita hahú koñese nia, ida ne’e mak los nu’udar aman ida ba ita barak, akompaña ita iha ita nia maneira oi-oin, nu’udar maun ida, nu’udar belun ida, nu’udar pastor iha ita nia kreda durante tempu naruk nia laran,” haklaken Dom Virgílio da Silva do Carmo, iha ómilia, Sábadu (30/10), iha Katedral Díli.

Dom Virgílio dehan, tenke agradese ba buat hotu ne’ebé Dom Basílio hala’o ona iha uma-kreda. Tanba Dom Basílio sempre laran luak no atende ema hotu iha situasaun saida deit.

“Dom Basílio hanesan ema ida ne’ebé moris, nia ema ida ne’ebé hakarak to’o ba ema hotu, nia la halo nia an ba nia an rasik deit, ka ba dioseze Baucau deit, maibé ema ne’ebé fó nia an, disponibilidade ba ema hotu ne’ebé presiza, amu lulik, sarani ema hotu ne’ebé buka nia, nia nafatin nakloke, nia telefone 24 oras ne’e loke nafatin hela deit, ha’u hatene ida ne’e tanba ami na’in tolu kuandu enkontru, maske enkontru urjente mais telefone mai nia tenke hamrik ba foti atu hatán, hatudu deit katak ema ida ne’ebé mós nia la tau nia an, nia ajenda mak halo tuir Maromak nia hakarak” katak.

Dom Basílio do Nascimento moris iha Suai, Covalima, iha loron 14, fulan Juñu, tinan 1950, oan husi Vitór do Nascimento no Teresa Mesquita do Nascimento.

No Dom Basílio hala’o hahú eskola iha eskola Primária Zumalai iha tinan 1956 to’o tinan 1958, no kontinua fali iha Maliana, iha tinan 1959 to’o 1962, no tama iha Semináriu Menór Nossa Senhora do Rosário de Fátima-Dare iha tinan 1963 to’o 1969.

Dom Basílio, simu ordenasaun saserdotál iha loron 26, fulan Juñu tinan 1977, iha Évora, Portugál. Hafoin nia ordenasaun saserdotál, nia ba Paris servisu iha asisténsia relijioza ba imigrante sira.

Nia hela iha Paris to’o tinan 1982, no durante períodu ida-ne’e nia konklui ona Lisensiatura iha Teolojia Pastorál no Katekeze iha Institutu Katóliku Paris nian, no hetan ona diploma Literatura no Lian Franseza nian.

Iha tinan 1982, fila hikas ba Évora, iha ne’ebé nia sai hanesan responsavél ba parókia Cano no Casa Branca, iha Sousel, no parókia Santa Vitória do Ameixial, iha Estremoz.

Iha Évora, Dom Basílio hetan mos nomeasaun nu’udar membru husi ekipa formadora presemináriu Vila-Viçosa, Arquidiocese Évora nian. Nia mós sai manorin Teolojia Pastorál iha Institutu Superiór Teolojia, Diretór Espirituál Semináriu Maiór Nosa Señora Purifikasaun, iha Évora, no sai mós hanesan responsavél diosezanu iha Sekretariadu Pastorál Vokasaun sira nian.

Dom Basílio fila mai TL iha fulan Outobru, tinan 1994, iha ne’ebé simu nomeasaun nu’udar vigáriu parokiál Parókia Nosa Señora Rosário Fátima, iha Ainaro. Iha fulan Dezembru, tinan 1995, hetan nomeasaun nu’udar vigáriu episkopál ba asuntu pastorál sira dioseze Dili nian.

Saserdote ne’e simu ordenasaun episkopál, iha loron 6, fulan Janeiru 1997, iha Roma. Iha loron 30, fulan Novembru tinan 1996, Papa João Paulo II nomeia nia nu’udar Administradór Apostóliku Baucau no Bispu Septimunicia. Dom Basílio simu pose iha Dioseze Baucau, iha loron 19 fulan Marsu tinan 1997, iha festa São José. Iha serimónia ne’e, Núnsiu Apostóliku iha Jakarta, monseñór Pietro Sambi mós akompaña nia.

No nomeia nu’udar Administradór Apostóliku Dioseze Díli nian, kargu ne’ebé nia okupa entre loron 26 fulan Novembru, tinan 2002 to’o loron 27 fulan Fevereiru tinan 2004.

Iha loron 6, fulan Marsu tinan 2004, Dom Basílio simu nomeasaun nu’udar Bispu Dioseze Baucau, husi Papa João Paulo II, ne’ebé sei termina iha tinan. Iha loron 7 fulan Dezembru tinan 1999, Dom Basílio simu distinsaun grau de Grã-Krús Ordem Liberdade, husi Portugál.

PR hato’o sentidu lutu ba falesimentu Dom Basílio

Prezidente Repúblika (PR) Francisco Guterres Lú Olo hato’o sentida kondolénsia ba Konferénsia Episkopál Timor-Leste, Igreja Katólika no família, tanba lakon ona figura diak ida Dom Basílio do Nascimento.

Hafoin presta omenajen ikus iha Katedral Díli, Lú Olo sente lakon líder importante ida husi kreda katólika nian, iha ne’ebé deit sempre kuidadu nia bibi-atan sira.

“Ha’u nia sentimentu mak ida ne’e ita lakon lider boot ida, Igreja katólika nian no mós iha ita nia sosiedade ba ita nia komunidade tomak tantu lider boot ida ne’ebé durante tempu nia sempre neon na’in nafatin, ba nia povu liu husi luta ida naruk, ne’ebé nia mós partisipa í por outru ladu nia mós neon na’in ida ne’ebé hatene kuidadu nia bibi atan sira, hanesan bibi atan diak ida ba sarani sira hotu iha Timor-Leste” espresa PR.

PM Taur sente sokadu, bainhira rona Dom Basílio hakotu iis

Primeiru Ministru (PM) Taur Matan Ruak, sente triste no sokadu, bainhira rona novidade kona-ba Bispu Dioseze Baucau, Dom Basílio do Nascimento nia mate.

“Ha’u sente sokadu, triste no lamentavel tebes, bainhira rona notísia tristeza kona-ba Amu Bispu Baucau Dom Basílio do Nascimento nia mate ne’ebé derrepente de’it, ha’u la espera katak ita-nia Amu Bispu bele hasoru situasaun hanesan ne’e, maibé ne’e Maromak nia planu ita-hotu la hatene, mai ita-hotu hasa’e orasaun ba Aman Maromak atu simu ita-nia saudozu iha na’i nia kadunan santu,” espresa Taur Matan Ruak, liu husi komunikadu ne’ebé GMN asesa.

Xefe Governu hato’o sentida kondolénsia kle’an ba família mate-bian no no sarani katólika iha TL laran tomak, liu-liu sarani dioseze Baucau ne’ebé nia serví iha Dioseze Baucau durante tinan 25.

“Hodi ha’u nia naran rasik, ha’u-nia espoza no Governu Timor-Leste nia naran, hakarak hato’o profunda sentida kondolénsia ne’ebé kle’an ba família hosi Amu Bispu nian em partikular, sarani Dioseze Baucau no Uma-Kreda Timor-Leste ba lakon bibi-atan diak ne’ebé serví ona Dioseze Baucau besik tinan 25” hakotu.

Dom Norberto preokupa ho fasilidade Ospitál Suai

Amu Bispo Dioseze Maliana, Dom Norberto do Amaral preokupa ho kondisaun fasilidade saúde iha Ospitál Referál Suai, Covalima, ne’ebé la adekuadu.

Bispu Dioseze Maliana ne’e mós preokupa ho atendimentu husi pesoál aero sira, tanba tarde tebes hodi halo evakuasaun ba Dom Basilio do Nascimento mai Díli.

“Aparellu sira iha Suai ne’e buat antigu ida, balun la funsiona tan, osan barak maibé ospitál ne’e sabraut deit, ne’e la’os krítika, maibé ne’e realidade” kestiona Bispu Maliana ne’e, hafoin missa requiem ba Amu Bispo Dom Basílio nia isin mate iha Katedral Díli.GMN/Ags/Aba/Ben


Banner

Foto

Notisia Ikus

Governu adia dikusaun ba pedidu reforma Lere Anan Timur

January 20, 2022
Reuniaun Konsellu Ministru (KM) iha Palásiu Gov...

La atende kontaktu deputadu nian, PPN “hirus” MOP Salvador

January 20, 2022
[caption id="attachment_59069" align="aligncenter"...

CNE seidauk simu lista kandidatura PR

January 19, 2022
[caption id="attachment_59064" align="aligncenter"...

Eis Padre Martinho Gusmão deklara kandidata-an ba PR

January 19, 2022
Eis padre Martinho Germano da Silva Gusmão anú...

Ministru José Agustinho “ameasa” hasai funsionáriu APORTIL 24

January 19, 2022
[caption id="attachment_59043" align="aligncenter"...
1 2 3 683

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker