Órgaun Soberanu Portugés no Conferénsia Episcopál Portuguesa (CEP) nian, hato’o sira-nia laran triste bainhira rona Dom Basílio do Nascimento nia falesimentu, iha loron 30, fulan Outobru, tinan ne’e.
Sentidu profunda konsternasaun kona-ba Dom Basílio do Nascimento nia mate mai husi entidade oi-oin iha rai laran nomós husi rai-liur, Prezidente República Portuguesa, Marcelo Rebelo de Sousa, liuhusi nota ofisiál ida lamenta ho Bispu Baucau ne’e nia mate.
Xefe Estadu Português ne’e hatete, Dom Basílio nu’udar figura markante ida iha luta ba independénsia Timor-Leste (TL), tanba Dom Basílio halo ona papél fundamentál ne’ebé dezempeña mak defende liberdade no demokrasia iha nasaun TL.
Nune’e mós, Prezidente Asembleia Repúblika Portuguêsa, Eduardo Ferro Rodrigues mós expresa, profunda tristeza, ba Dom Basílio nia mate. Tuir Eduardo, Dom Basílio motivadór prinsipál ba independénsia, hodi luta ba liberdade no demokrasia TL, valór ho prestasaun ne’ebé iha, nunka husik povu timor la’o no luta mesak ba independénsia.
Nune’e mós, Primeiru-Ministru Portugués, António Costa, liu husi nia konta twitter, hato’o sentidu kondolénsia, ba Dom Basílio do Nascimento nia mate. Xefe Governu Portugués ne’e hatete, Dom Basílio hanesan Bispu ne’ebé mak sempre hamutuk ho povu, hodi defende liberdade no demokrasia iha TL. Dom Basílio mós nu’udar papél importante iha prosesu referendum independénsia, iha tinan 1999.
Alem de orgaun soberanu Portuguêsa nian, sentidu profunda konsternasaun mós, mai husi Konferénsia Episkopál Portuguêsa nian. Nota ne’ebé mai husi Sekretáriadu-Jerál Konferénsia Episkopál Portuguêsa hatete, Igreja sira iha Portugál, sente kontente ho prezensa matenek, no tranquilu husi Dom Basílio do Nascimento, partikularmente iha arkidioseze Évora, fatin ne’ebé Dom Basílio estuda, no ordena ba saserdote, hodi asumi kna’ar hanesan, amu pároku, profesór teolojia, diretór espiritual iha semináriu no responsável ba vokasaun pastorál.
Iha sikun seluk, Bispu português sira hanoin fali, papél relevante husi Dom Basílio do Nascimento, hodi harí demokrasia ba nasaun TL, no Dom Basílio nu’udar vozes ezekutada iha períodu, antes referendum tinan 1999, no nia komentáriu sira ne’e, revela liu, ba situasuan iha TL.
Dom Basílio, fila mai TL iha tinan 1994, hafoin hetan nomeasaun iha loron 30 fulan Novembru tinan 1996, husi São Jõao Paulo II, nu’udar Administradór Apostóliku Baucau, no simu nia ordenasaun episkopál iha tinan 1997.GMN
