GMN TV Economia Ró Berlin-Ramelau Bele Halo Ona Operasaun ba Oecusse-Ataúro

Ró Berlin-Ramelau Bele Halo Ona Operasaun ba Oecusse-Ataúro

79 views

Primeiru Ministru (PM) Taur Matan Ruak, iha loron Segunda (20/12) ne’e, ofisialmente lansa ró Berlin-Ramelau, hafoin entrega husi Governu Repúblika Alemaña, iha portu Díli.

Tanba ne’e hahú iha Tersa (red-ohin), loron 21/12 ró Berlin-Ramelau bele hala’o ona operasaun hodi tula pasajeiru husi Díli ba Oecusse no Díli Ataúro.

Taur Matan Ruak hatete, ho prezenta ró ahi foun ne’e hanesan prezente furak ida ba povu Timor-Leste (TL), liu-liu komunidade Reziaun Autónomu Espesiál Oecusse Ambeno (RAEOA) no Ataúro. No prezensa transporte marítima ne’e, hodi garante nafatin konetividade entre rai-ketan ambeno no Ataúro

PM Taur Matan Ruak, Ministru MTK José Agostinho da Silva ho reprezentante GIZ halo lansamentu ba ró Berlin-Ramelau iha Portu Díli, (20/12 2021).

Primeiru Ministru Taur Matan Ruak,apela ba Governu Alemaña bele reforsa Timor-leste iha área Maritíma,atu bele apoiu halo manutensaun ba ró sira iha Timor-Leste, tanba tinan barak ona, Governu lakon finanseiru, rekursu no lakon tempu ba iha Indonézia.

“Projetu ida ne’e,sai hanesan prezente ida ba populasaun Oecusse no Ataúro, em partikular, maibé prezente bo’ot ida mos ba povu Timor tomak, liu-liu iha altura ne’ebé ró ida hakdasak hela iha ne’e, laiha posibilidade atu la’o no projetu sira iha ministériu transporte no komunikasaun halo esforsu para que garante ita-nia konetividade entre Oecusse ho Díli, Díli ho Ataúro ne’ebé durante ne’e infrenta hela problema barak,” dehan Xefe Governu.

Eis Prezidente Repúblika ne’e apela ba tripulante sira atu kuidadu nafatin ró-ahi foun daruak ne’e, hodi fasilita diak liu-tan komunidade Oecusse no Ataúro ba mai Díli.

Governu kontinua husu Alemaña apoia manutensaun ba ró sira

Primeiru Ministru (PM) Taur Matan Ruak, iha nia diskursu seremonia hand over ro Berlin-Ramelau iha Segunda (20/12).

Mesmu Governu Alemaña apoiu ona fundu euro milaun 7 ba prosesu konstrusaun ró Berlin-Ramelau, maibé Governu TL kontinua husu atu Alemaña apoiu nafatin iha prosesu manutensaun sira.

Tanba tinan-tinan ró sira Unidade Polísia Marítima (UPM), Komponete Naval (F-FDTL), Berlin-Nakroma no ró-ahi sira seluk iha TL tenke ba halo manutensaun ka ‘docking’ iha nasaun seluk, tanba nasaun foun ne’e seidauk iha fatin própriu ba docking, no mós sei menus rekursu umanu iha área ne’e.

“Transporte komunikasaun nian iha rua ne’ebé kuaze sanulu, ne’ebé ita haruka tinan-tinan ba Indonézia, ne’bé lakon rekursu, lakon tempu, entaun ha’u apela para que Governu Alemaña konsidera ida ne’e, se bele reforsa parseria ida ne’e iha área marítime, no kompleta ho infraestruta manutensaun ba ró sira-nian” sujere Taur Matan Ruak.

Nia afirma, TL ukun-an tinan besik tinan 20 ona sei menus rekursu, maibé Taur optimista katak, iha futuru Timor-oan rasik mak sei sai tripulante hodi halo operasaun ba ró sira iha rai-laran.

“Difisil liu mak transforma guerileiru ba marineiru, agora transforma marineiru ba marineiru ne’e fasil liu, i ita iha entaun ha’u hakarak parabeniza ho esperiénsia ida ne’e, ha’u espera katak tinan hira mai oin, totalmente ita-nia ema mak kaer ró rua ne’e” garante eis guerilleiru ne’e.

APORTIL: Governu tenke estabelse fatin Docking

Antes ne’e mós Prezidente Administrasaun Portuáriu Timor-Leste (APORTIL), Flávio das Neves hatete, transporte marítima ne’e to’o ona iha TL, maibé Governu presiza estabelese fatin manutensaun ka Docking iha rai-laran, nune’e hamenus gastu.

“Ha’u hanoin problema ida ita enfrenta ne’e, Governu tenke tau atensaun másimu atu loke Dock (docking) ida, tanba ró foun mak ita ba hadia iha estranjeiru ne’e iha esperiénsia barak mak ita halo, mais esperiénsia ne’e sai lisaun ida mai ita. Ha’u prefere Governu loke Dock manutensaun iha ne’e, atu bele fó oportunidade servisu ba ita-nia joven sira, tanba Timor-oan barak mak eskola iha área ida ne’e, mais la konsege servisu, tanba laiha fatin atu akomoda,” sujere Prezidente APORTI, Portu Díli, Sesta (10/12).

Kona-ba rekursu, Ró Berlin-Ramelau mós sei presiza rekursu umanu husi Timor-oan rasik hodi hala’o operasaun ba ró ne’e. Tanba atualmente iha ema na’in 17 husi estranjeiru mak halo operasaun ba transporte marítima ne’e.

Flávio das Neves informa, dadaun ne’e Timor-oan hamutuk 14 mak tuir hela formasaun atu sai tripulante hodi halo operasaun no kuidadu kondisaun tomak ró Berlin-Ramelau durante hala’o operasaun.

“Lista iha timor-oan 14 pesoas preparadu, ita halo hela treinamentu, mais ita presiza tan ema estranjeiru na’in tolu bele mai halo kna’ar ida ne’e” tenik.

Ró Berlin-Ramelau rejistadu iha IMO

Ró Berlin-Ramelau rejistadu ona iha Organizasaun Internasionál Marítima (IMO-sígla Ingles) ho númeru rejistu 9911393 nu’udar ró cargo pasajeiru/ ro-ro.

Ró Berlin-Ramelau rejistadu ho Bandeira St. Vincent no Grenadies ho nia kapasidade tonelajen ka gross tonnage hamutuk 3.409, no nia largura iha metru 16 kuadradu no komprimentu metru 64 kuadradu, ho nia kapasidade tula pasajeiru hamutuk 350, no bele tula ho karreta 10 resin.

Fundu ba konstrusaun ró Berlin-Ramelau, ko-finansia husi Governu Repúblika Ferál Alemaña euro milaun 7 no Governu TL milaun 14,8.

Ró ne’e Governu TL liuhosi MTK, assina akordu ho Governu Federál Alemaña no empreza estaleiru navál “Damen”, iha loron 31, fulan Maiu, tinan 2019, hodi hahú konstrusaun ba ró Berlin-Ramelau.Fer


Banner

Foto

Notisia Ikus

Governu adia dikusaun ba pedidu reforma Lere Anan Timur

January 20, 2022
Reuniaun Konsellu Ministru (KM) iha Palásiu Gov...

La atende kontaktu deputadu nian, PPN “hirus” MOP Salvador

January 20, 2022
[caption id="attachment_59069" align="aligncenter"...

CNE seidauk simu lista kandidatura PR

January 19, 2022
[caption id="attachment_59064" align="aligncenter"...

Eis Padre Martinho Gusmão deklara kandidata-an ba PR

January 19, 2022
Eis padre Martinho Germano da Silva Gusmão anú...

Ministru José Agustinho “ameasa” hasai funsionáriu APORTIL 24

January 19, 2022
[caption id="attachment_59043" align="aligncenter"...
1 2 3 683

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker