Julio Hornay reskoñese ema sunu uma iha Citrana

Komandante Jeral Polísia Nasionál Timor-Leste (PNTL), Komisariu Julio Hornay, rekoñese,  iha ema balun sunu duni komunidade nia uma iha Citrana, Rejiaun Espesial Oecussi Ambeno (RAEOA).

“Akontese ho akontese, ha´u-nia Komandante Oecussi, Komandante Unidade Polísia Fronteira (UPF)  informa  kedas mai ha´u katak, ahi han  uma iha Citrana, sira halo atendementu emediata, sira  haruka  ekipa  investigasaun ba kedas fatin akontesimentu i sira rekolha informasaun oras  ne´e dadauk  sei prosesu  investigasaun,“esplika Komandante Jeral PNTL Komisariu Julio Hornay, ba GMN Sabadu (12/05/18), hafoin informa situasaun jeral iha studio GMN Bebora Díli.

Komsiariu Julio Hornay, la esplika detalhus  kona-ba  kauza  husi akontesimentu ne´e, bainhira  investigasaun remata mak sei  informa ba  públiku.

“Ha´u  fó ordem ba sira katak, imediatamente informa mai ha´u kona-ba rezultadu saida mak akontese, suspeitu  husi ne´ebé, kauza  husi saida  se mak halo, tanba saida  ahi han  povu nia uma, se mak sunu no se mak autor, maibe ha´u  seidauk bele koalia  husi ne´ebe se, tanba sei iha  prosesu  investigasaun nia laran,“dehan  Julio Hornay.

Alende ne´e, tuir imajen  ne´ebé mak  espalha iha  media sosial facebook katak, iha insidenti ema suni komunidade nia uma ne’e, iha uma hat mak hetan sunu  no  motor ida.

Maske akontese iha Oecussi,  maibe  Komsiariu Julio Hornay dehan, situasaun jeral  iha Munisípiu seluk situasaun la´o hakmatek prosesu to’o kontajen  votu iha sentru votasaun ida-idak.avi