Portugal-TL asina PEC iha Lisboa ho montante euro millaun 70

Portugal no Timor-Leste (TL), Tersa (25/6/19), asina Programa Estratéjika Kooperasaun (PEC-sigla Portugés) iha Lisboa, ho montante euro millaun 70, hahú tinan ne’e to’o kooperasaun ne’e implementa tinan 2023.

Reporter GMN, Tito Livio, husi Portugal hato’o reportajen katak, akordu entre nasaun rua ne’e, asina hosi Ministru Negósiu Estranjeiru no Kooperasaun Timor-Leste, Dionísio Babo, ho Sekretária Estadu Estrangeiru no Kooperasaun Portugal, Teresa Ribeiro.

Hafoin asina akordu, iha konferénsia imprensa, xefe diplomata Portugés, Augusto Santos Silva, hateten, akordu ne´e iha “aumentu konsiderável” kompera ho protokolu anterior, ho valor euro millaun 42.

“Programa ne’e iha 2019 to’o 2023 iha ne’ebé iha euro millaun 70 signifika katak, kontinua ba oin ho programa prioridade sira”, dehan  Ministru Negósiu Estranjeiru Portugal, Augusto Santos Silva.

Ministru Negósiu Entranjeiru no Kooperasaun Timor-Leste, Dionísio Babo,  konsidera akordu entre nasaun rua nee sei fó benefísiu ba Timor-Leste.

“Asina ne’e iha area edukasaun, justisa no iha area sel-seluk ne’ebé mak importante. Kooperasaun programa ne’e to’o 2023, ne’ebé haú hanoin Timor mos sei aproveita ida ne’e”,dehan Dionísio Babo.

Kooperasaun entre Timor-Leste no Portugal konsentra iha área edukasaun, liu-liu iha ensinu lian portugés, boa governasaun, justisa, defeza no seguransa no finansa públika.

Iha área edukasaun, konta ho presensa profesor portugés sira nian hamutuk 140, liu hosi programa ne´ebé abranje estudante Timorense hamutuk 6.500.*****