Anin sobu uma 16 ho eskola ida iha Camea

Anin boot ne’ebé akontese iha Sesta (02/08/2019) konsege sobu uma komunidade nian hamutuk 16 inklui mós eskola ida iha Aldeia Namalai, Suku Camea, Postu Administrativu Kristu-Rei, Munisípiu Díli.

Hafoin akontese ne’e Xefe Aldeia Namalai, Fernando Maia, hatoo problema anin sobu uma no estraga plantasaun, autoridade ne’e informa kedas situasaun ne’e ba autoridade postu Cristo-Rei, maibé seidauk iha resposta ruma.

 “Ha’u haree ha’u nia komunidade sira sente triste duni tanba uma anin sobu ne´e kauze 16 mak estraga hotu, fiu sira ne´e mós latan hotu ba rai i ha’u kontaktu ona parte governu liu-liu Ministériu relevante atu bele tau atensaun ba situasaun ida ne´e, maibe to´o agora la mai iha ne´e, ne´ebé ha’u prekupa”, afirma Xefe Aldeia Namalai, Fernando Maia, ba Jornalista sira Sábadu (03/08/2019).

Husi anin boot ne’ebe estraga komunidade nia uma no eskola inklui plantasaun ne’e núdar autoridade local sei kontinua hato’o ba parte kompetenti atu be;e resolve problema refere.

Komunidade husu Governu labele abandona

Iha fatin hanesan komunidade, Domingos Salun Mendonça, hateten, sira sente triste ho situasaun ne’e tanba estraga hotu sira nia uma inklui mós plantasaun balun nune’e nia parte husi ba governu liu-liu Ministériu kompetente atu tau matan ba problema ne’ebe sira hasoru ne’e.

“Ami husu ba Governu tenke tau matan mai ami, tanba agora dadaun ne’e ami hela deit iha mota kuak liu-liu fatin ne’e mak seguru ba ami para atu hela, tanba uma anin sobu hotu fiu eletrisidade monu hotu, sorte ahi mate, se lakan ahi soke mate hotu ami”, preokupa komunidade Namalai.

Komunidade sira husu ba governu atu labele abandona sira ho proble sira ne’ebe refere.

“Labele iha tempu kampañia besik mak mai, maibé ami hasoru hela problema hakat netik mai iha ami nia fatin hodi haree rasik ho matan saida ma kami hasoru iha ne’e”, afirma komunidade.

Enkuantu Aldeia Namalai kompostu husi Xefe familia hamutuk 126 no total populasaun kuaze 397. Aes