JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Vírus corona daet ona ba nasaun 21, TL kontinua halo prevensaun

Vírus corona daet ona ba nasaun 21, TL kontinua halo prevensaun

Novel coronavirus (vírus corona) husi sidade Wuhan-Xina kontinua espalla ba nasaun sira iha mundu  hodi amesa populasaun nia vida atu prevene moras ne’e nasaun hotu-hotu tenta fó seguransa ba nia nasaun inklui Timor-Leste (TL).  

Novel coronavírus atu hanesan ho coronavírus síndrome respiratória médiu oriente no síndrome respirátoria agudu grave ne’ebé bele kauza moras hahú husi inus been,   isin manas, mear, dada iis susar to’o moras sériu hanesan pneumonia no insuficiência renal.

Vírus ne’e tranzmite husi animal ba ema no daet tutan husi ema ba ema liu husi fani no mear, dadaun ne’e iha surtu kona-ba pneomonia ne’ebé mak kauza husi virus tipu fóun  husi novel coronavírus ne’ebé mósu iha sidade Wuhan kontinental Xina iha 31 dezembru 2019.

Novel Coronavírus primeira ves deskobre iha merkadu hahán nian tasi Huanan iha ne’ebé faan mós animal maus no animal fuik sira hanesan niki, laho, samea no sira seluk.

Hafóin detekta ema nain 40 resin iha Wuhan kona vírus ne’e, governu Xina deside taka merkadu Wuhan, Huanan no evakua infetadu sira ba karantina hala’o tratamentu intensivu.

Ho deit tempu badak vírus ne’e espella lalais liu husi Wuhan to’o sidade Shanghai ho Beijing. Dadus ikus hatudu novel coronavírus hamate ona ema nain 213 no nain 9.816 mak infetadu iha Xina.

Novel Coronavírus ne’e mós kontinua espalla ba nasaun 21 hanesan Hongkong, Korea do Sul, Japaun, Vietnam, Singapura, India, Filipina, Italia, Uni Emiradu Árabe, Malazia, Taiwan, Tailándia, Nepal, Kamboja, Kanadá, Fransa, Srilanka, Alemaña, Finlandia inklui Estadu Unidu Ámerika no Austrália ne’ebé hanesan nasaun viziñu TL nian.

Kontájiu ida ne’e akontese tanbá movimentu ema nian husi sidade Wuhan ba nasaun hirak ne’e  hafóin selebra tinan fóun xinés nian.

Vírus Corona ne’ebé mósu iha Wuhan   la’ós afeta deit ba sosiedade xineza,   maibé afeta mós ba Timor-oan sira ne’ebé hala’o estudu no servisu iha Xina, atualmente estudante Timor-oan ne’ebé hala’o estudu iha Xina   hamutuk atus rua resin   no sira ne’ebé hala’o estudu iha sidade Wuhan   provínsia Hubei hamutuk ruanulu   maibé agora iha deit nain sanulu resin hitu   tanbá seluk transporta ona ba Beijing.

Bolseiru hirak ne’ebé sei iha Wuhan kontinua ezije governu TL atu koalia ho governu xinés atu transporta sira ba provínsia seluk iha Xina tanbá sente ameasadu.

“Husu ba estadu Xina atu halo atuasaun emerjensia hodi muda sai timoroan sir aiha sidade wuhan, ami presiza tebes evakuasaun atu emerjensia sira husi parte relevante iha Xina hodi bele evakua ami husi sidade ne’e tanbá problema ida ne’e problema serio,” dehan Estudante Timor-oan iha Wuhan, Mozanquinho Fernandes.

Lee hotu :   Tempu badak STAE realiza eleisaun suku foun

Tuir Organizasaun Mundiál Saúde (OMS) novel coronavírus grupu ida ho coronavirus síndrome respiratória aguda grave ho sigla inglés SARS no Síndrome respiratória Médiu Oriente ho sigla inglés MERS vírus ida ne’e moris no dezenvolve aan iha animal sira nia isin liu-liu niki.

SARS-coronavírus primeira ves mósu iha provínsia Guangdon, Xina iha tinan   2002 hamate ema 774 no nain 8.098 resin mak infetadu  tuir dadus OMS iha fulan Jullu 2003.

No MERS-coronavírus mósu iha Arábia Saudita iha tinan 2015 ne’ebé hamate ema 839  iha nasaun 27 no nain 2.428 mak infetadu  tuir dadus OMS ne’ebé fó sai ikus iha fulan Abril 2019.

Sintoma jeral husi ema ne’ebé kontamina SARS-Cov ho MERS-Cov mak isin manas mear susar atu dada iis ulun moras diarreia.

Brigada Médiku Xina Iha TL, Doutór Huang Dan esplika novel coronavírus fasil tebes daet  wainhira ema ne’ebé suspeita ona mear ou fani iha ema seluk ne’ebé la uza máskara.

“Virus Corona mak  tipu virus ida ne’ebé antes ne’e ema seidauk hetan, virus ne’ebé afeta ba pneumonia iha Wuhan iha Dezembru tinan 2019 mak virus corona fóun ou ho naran 2019-nCoV ne’ebé hanaran husi organizasaun saúde mundiál ka W-H-O,” Huang Dan esplika.

Nia hateten, tuir análiza husi Chinese Center for Disease Control and Prevention, Virus Corona nia prosesu transmisaun liu husi kontaktu direta ho ema ne’ebé afetadu, maske nia hun husi corona virus sedauk klaru. Simplesmente kontaktu direta ne’e bele ho pasiente ne’ebé konfirmadu afetadu corona virus hanesan sa’e hamutuk iha transporte ida, hela hamutuk iha uma ida, igreja ou hala’o atividade hamutuk maibé seidauk fóti dezisaun hodi asegura nia-an hanesan uza máskara no seluk-tan.

Virus ne’e to’o agora seidauk iha ai-moruk hodi kura, maibé governu Xina halo ona diagnostika no planu ba tratamentu husi rezultadu hirak ne’e to’o agora númeru pasiente ne’ebé di’ak husi moras refere hatudu ona númeru siginifkativu.

Brigada Médiku Xina ne’e mós rekomendasaun ba komunidade TL atu bele hasoru moras ida ne’e mak, tenke prevene an liuhusi fase liman hela de’it   tau atensaun ba higiene pesoál, uza máskara, halo ezersisiu para aumenta imunidade ba isin, evita an husi servisu ne’ebé maka’as bainhira sente isin manas kontaktu kedas doutór no labele paniku, etapa ba prevene no kontrolu ne’e presiza atensaun husi ema hotu.

Lee hotu :   TL OFISIALMENTE SAI MEMBRU WOSM

“Hau mós akompana ona iha notisia katak governu TL fóti ona dezisaun ba prevensaun ho ativu, ekipa médiku Tiongkok mós sei ativu liu tan servisu ho Ministériu Saúde no ospital Nasional atu bele asegura saúde komunidade sira iha TL,” tenik Nia.

Relasiona ho novel coronavírus ne’ebé komesa domina mundu OMS alerta ba nasaun sira atu hafórsa sistema vigilância iha aeroportu, portu no fronteira hodi kontrola movimentu ema tama no sai husi nasaun.

Diretor Jerál Prestasaun Saúde, Odete Viegas infórma, ministériu saúde koloka ona pesoál saúde ho termofóku neen iha aeroportu, portu no fronteira hodi kontrola pasajeiru sira se deteta iha sintomas ba novel coronavírus maka pesoál saúde lori kedas suspeita ne’e ba iha sala izolamentu iha óspital nasionál.

“Paso saida mak Ministériu saúde halo ona mak ami desenvolve deklarasaun saúde relasiona ho moras corona virus no depois mós infórmasaun husi moras ne’e rasik ou sintomas ba moras corona virus, panfletu no stand baner infórmasaun de nota fólheta infórmativu ne’ebé mak ami tau iha aerportu iha mós portu terestre tanbá ita hare’e kazu ne’e liga ho pasajeirus sira ne’ebé tama sai entaun ita tenek hare’e pontus importante ne’ebé maka tu fó atensaun no ami laos mesak deit maibé kordena ona ho diretor aviasaun no negosiu estranjeiru ba ita nia bolseiru iha Xina sei afeita ka lae no felizmente sira mós la afeita”, dehan Odete.

Diretor Jerál ne’e mós esplika, ekipa de preparasaun ne’e sira mós tenke iha ekipamentus ne’ebé aproriadu  para sira atu uza mak maskara luvas tanb’a moras ne’e nia sitoma bain-bain hanesan, moras flu isin manas mear iss boot maibé kuandu nia komplika ba iha pneumnomia bele sai hanesan moras ne’ebé aguda sevia.

Ministériu iha termal scan ida ne’ebé avaria hela maibé dadaun ne’e uza fali termal fóku ne’e ekipamentu kiik ida bele deteta ba ema isin manas, agora dadaun Ministériu saúde iha 6 tau iha portu no portu de entrada iha mós motain no fatin ne’ebé ou husi portu nian ekipamentu sira ne’e iha.

 “Se’e ita hetan pasajeirus mak to’o mai iha aerportu mak suspeirta karik ekipa ne’eb’e preparadu iha ne’ebá ambulansia tenek halo kedas ba HNGV no HNGV mós iha fatin isolamentu ne’e kotuk ne’ebá ne’ebé nia la kahur ho pasiente sira seluk iha kama sanulu para ita preparadu ba iha fatin ida ne’e,” esplika Odete.

Lee hotu :   MOP husu motorista labele liu husi mota Kasnafar iha tempu udan

Nia konsidera ekipamentu sai obstakulu maibé husi HNGV prepara ona proposta ba OMS no sira prontu atu apoiu ba ekipametnu inklui masker luvas no buat balun ne’ebé presiza atu diagnosa katak nia hetan moras, orsida sample ne’e sei haruka ba Australia atu bele tes konfirmasaun tanbá iha reajente ida mak HNGV laiha ne’e so ema ne’ebé mak iha akapsidade ho background siensia ne’ebé aas hodi halo teste ba ida ne’e.

Atu prevene coronavírus tama TL, Diretór Jeral Migrasaun Ministériu Interior,   Superintendente Agostinho Gomes ho ekipa kontinua koopera ho parte kompetente sira  atu kontrola pasajeiru ne’ebé  halo viajen mai TL liu-liu sira ne’ebé fóin halo viajen husi Xina.

“Servisu migrasaun MI TL hahu halo ona kordenasaun ho parte kompotente para oinsá kontrola pasajeirus ne’ebé halao viazen espesialmente husi Xina, servisu imigrasaun orienta ona adido nain 3 nomeadamente iha Darwin Australia, Bali Indonezia no Singapura atu kordena ho aviasaun ne’ebé atu halo viazen mai Dili TL ho nune’e sira bele observa no monitor sei karik iha indikasaun positivu kona-ba sintoma virus corona husi pasajeirus sira ne’e bele sujere sira para kansela sira nia viajen tanbá obriga sira tama teritoriu TL mak servisu imigrasaun sei halo rekuzasaun tuir lei imigrasaun artigu 23 konaba rekuza entrada numeru 1 a linea B, servisu imigrasaun bele rekuza sidadaun ida tama teritoriu nasional TL wainhira konsidera fó perigu ba nasaun inklui virus corona ne’ebé sai ameasa boot ba komunidade internasional,” dehan Agostinho.

TL nasaun joven liu iha sudeste aziátiku ne’ebé hasoru dezafiu no limitasaun oioin   atu responde ba asuntu emerjensia sira iha saúde publika   maibé governu kontinua esfórsu hodi prevene nasaun TL husi novel coronavírus maske ho situasaun polítika rai laran ne’ebé inserteza kondisaun orsamentu ne’ebé ladun di’ak no ekipamentu ne’ebé la sufisiente atu hasoru virus ne’ebé  hamate ema ho rapidu iha mundu.

Enkuantu dadus ikus ne’ebé GMN asesu husi pasiente nain 9.816 ne’ebé infetadu novel coronavírus  nain 126 mak pozitivu rekopera.

No oras ne’e dadauk loja no super merkadu balun  iha Wuhan komesa ativu fila-fali hodi fasilita komunidade sira bele buka aihan no priense nesesidade loron-loron nian maske sei iha hela kondisaun izolada.Ida  

Add to Comments Here!!!!

error: Content is protected.
Secured By miniOrange
You might also like:
Alkatiri: Líder polítiku sira tenke apoia F-FDTL

Selebrasaun aniversáriu transformasaun, FALINTIL ba Forsa...

Espíritu FALINTIL nakonu ho onra no glória ■Lere: F-FDTL tenke ka’er metin prinsípiu militár

Prezidente Repúblika (PR), Francisco Guterres Lú...

PR Lú Olo: Karta Xanana nian ha’u mak hatene ■Povu labele fiar boatus EA

Prezidente Repúblika (PR), Francisco Guterres Lú...

Close