Citilink sei tula fila traballadór no mate-isin husi Korea du Sul

Diretór Nasionál Asuntu Konsular no Komunidade Timorense, Ministériu Negósiu Estranjeiru no Kooperasaun (MNEK), Ermínio da Silva Pinto, informa, Governu asina ona kontratu ho kompañia aéreo Citilink atu tula fila mate-isin no traballadór Timor-Oan iha Korea Sul, estudante, inklui sidadaun balun mai Timor-Leste iha loron 30, fulan ne’e.

Diretór Nasionál ne’e esplika, orsamentu ba selu aviaun ne’e responsabiliza husi Sekretaria Estadu Formasaun Profisional no Empregu, maibé MNEK halo koordenasaun de’it hodi fasilita traballadór sira ne’e mai Timor-Leste. Aviaun ne’e sei tula mos estudante no Timor-Oan balun ne’ebé atu fila mai Timor-Leste.

“Iha kedas semana rua ka tolu liu ba, tuir loloos mai iha loron 19, fulan ne’e, maibé tanba prosesu tékniku no administrativu balun ne’ebé mak ami presiza, maibé la’os MNEK nian de’it, maibé ami mos servisu hamutuk ho kolega sira husi Sekretáriu Estadu Formasaun Profisional no Empregu no mos ita-nia embaixada sira, liu-liu ita nia embaixada iha Nova Iorque, Thailandia no Malazia, ami haree buat ida ne’e. Agora dau-dauk iha ona faze ida ne’ebé mak oinsa para lori sira mai”, hateten Ermínio, Tersa (21-07), iha edifísiu MNEK, Praia dos Coqueiros-Dili.

Ermínio esplika, aviaun refere sei tula ema hamutuk 160 no ema sira ne’e kompostu husi traballadór Timor-Oan sira iha Korea du Sul, estudante nain neen husi Nova Iorque, estudante nain tolu husi Thailandia, Timor-Oan ida iha Malazia, inklui mos mate isin traballadór Timor-Oan ne’ebé mate iha Korea du Sul.

Tuir Diretór Nasionál Asuntu Konsular no Komunidade Timorense-MNEK ne’e sublina, Timor-Oan sira ne’ebé fila mai sei tama kuarentena, hodi kumpre protokolu Ministériu Saúde ni’an kona-ba prevensaun ba COVID-19. Oct