Laiha orsamentu, infraestrutura iha RAEOA balun paradu

Rejiaun Administrativa Espesiál Oe-Cusse Ambeno (RAEOA) kompostu hosi sub-Rejiaun haat (4), hanesan Nítibe, Oe-Silo, Pássabe no Pante Macassar.

Oe-Cusse mak sai hanesan rejiaun ne’ebé ho nia jestaun ekonomia  espesiál no autoridade sira mak bele jere rasik sistema hotu ne’ebé estabelese iha rejiaun refere.

Maibé tuir observasaun GMN iha RAEOA nota katak, dezenvolvimentu infraestrutura hanesan, grande projetu no infraestrutura báziku balun seidauk kompleta, tanba orsamentu ne’ebé aprovadu husi Governu sentrál ba tinan 2020 laiha, tanba xumba iha Parlamentu Nasionál (PN).

La’ós de’it orsamentu, maibé situasaun surtu COVID-19 mós afeta ba dezenvolvimentu iha RAEOA, hodi halo aktividade ekonomia balun mós paradu.

Iha Kinta semana ne’e, komisaun E PN ne’ebé trata asuntu infraestrutura halo fiskalizasaun ba projetu hotu iha RAEOA.

Iha fiskalizasaun ne’e, komisaun E identifika konstrusaun sira ne’ebé durante ne’e paradu hanesan Hotel Bintang Lima, konstrusaun jardin iha estrada sira no selu-seluk tan.

Husi parte seluk iha konstrusaun estrada ne’ebé presiza iha kontinuasaun, liu-liu estrada ligasaun ponte Noefefan ba Citrana, no mós estrada balun iha kapitál Pante Macassar, inklui estrada rurál sira.

Tuir komisaun E PN nia haree, presiza halo mós reabilitasaun ba edifísiu balun hanesan, edifísiu Diresaun Nasionál Terestre, Postu Integradu Sacato no mós estabelesimentu ba fatin kuarentena iha liña fronteira.

Alende ne’e, iha rekomendasaun balun husi pilotu Timor-Oan ne’ebé iha responsabel mós ba aviaun ZEESM husu ba Governu atu reativa fali voo Díli-Oe-Cusse, mezmu pilotu ne’ebé lori aviaun refere seidauk fila husi ninia nasaun, maibé sira prontu atu lori aviaun ZEESM.

Pilotu Timor-Oan sira ne’e mós konsidera, Governu la tau prioridade ba sira, mezmu sira remata ona kursu kona-bá aviasaun ni’an.

Mezmu dezenvolvimentu iha RAEOA paradu, maibé Prezidente Autoridade promete sei rezolve kestaun sira ne’e hotu, bainhira orsamentu tinan 2020 no 2021 aprovadu iha PN. san