Komunidade Marobo kontinua halerik ba estrada-eletrisidade

Komunidade iha kompleksu Marobo, postu administrativu Bobonaro, munisípiu Bobonaro, ne’ebé maioria moris ho vida agrikultura, kontinua halerik ba infraestrutura báziku hanesan eletrisidade no estrada, maske dau-daun ne’e Marobo sai hanesan fatin turizmu no nakonu ho produtu lokál.

José Kanelas Lelo, informa, kondisaun estrada ne’ebé la di’ak difikulta teb-tebes transporte hodi halo movimentasaun iha Marobo, liu-liu atu lori sira-nia produtu lokál ba fa’an iha merkadu, maibé komunidade sira la’o ho distánsia do’ok ba fa’an sira-nia produtu.

“Ba ami povu ki’ik sira promete dehan sai na’i-ulun atu haree ami povu, maibé agora baku malu fali iha Parlamentu, dudu kadeira meza ba mai halo povu mak stress, ami atu haree loos ida ne’ebé mak atu haree ami, iha ha’u nia hanoin na’i-ulun sira estrada iha kapitál Díli ukun-an tiha ona, maibé kompleksu Marobo seidauk ukun, tanba ami seidauk hetan ahi, ne’ebé husu Governu atu tau matan netik”, dehan komunidade iha kompleksu Marobo, munisípiu Bobonaro ne’e ba jornalista sira, Sesta (07-08-2020).

Komunidade, Antonino Mauleto de Araújo, hateten, to’o agora sira seidauk asesu estrada, nune’e mós eletrisidade, maibé iha kompleksu Marobo ne’e komunidade aldeia Atu-Aben mak asesu ona eletrisidade.

“Ami nia produk mak liis ho tomate no ai-manas, modo, maibé atu lori ba merkadu no Karabau ne’e distánsia dook, entaun tau hela ba mota sorin hodi tula ba, maibé estrada laiha, ami la’o de’it, kada vez sai tuku 02:00 dader, ami tutúr de’it ba hein kareta iha Asudai iha ne’e ba Maliana”, tenik Antonino.

Nune’e mós komunidade Marobo, Romualdo Letomau, husu ba Governu atu tau matan ba sira-nia preokupasaun, liu-liu ba eletrisidade, tanba durante ne’e komunidade seidauk asesu ba eletrisidade, nune’e difikulta estudante sira atu estuda iha tempu kalan.

Hatán ba preokupasaun ne’e, Vise Ministru Óbras Públika (MOP), Nicolau Lino Freitas Belo, hateten, Governu sei tau mós prioridade ba preokupasaun ne’e iha Orsamentu Jerál Estadu (OJE) tinan 2021.

“Ba futuru oinsa MOP koloka OJE 2021 ni’an bele koloka no tau prioridade tuir fazeadamente, ita sei esforsu, hodi tau esforsu, tanba fatin ida ne’e fatin estratéjia hodi atrai ema barak mai suku ou aldeia ne’ebé partense iha Marobo ne’e”, dehan Governante ne’e.

Entretantu kompleksu Marobo, postu administrativu Bobonaro, munisípiu Bobonaro, iha suku tolu (3) hanesan Soilesu, Ilatlaun no Atu-Aben, ho totál uma-kain hamutuk 1001 no populasaun 4861, kompostu husi aldeia hitu (7), maibé dau-daun ne’e iha aldeia lima (5) mak seidauk asesu ba eletrisidade. ida

Leave a Reply

Your email address will not be published. Required fields are marked *