Sítiu Bee-Manas Marobo ladún hetan atensaun

Prezidente Autoridade Munisípu Bobonaro, Zeferino Soares dos Santos, afirma, fatin turístiku Bee-Manas Marobo dau-daun ne’e ninia kondisaun ladún di’ak, tanba la hetan kontrolu no atensaun husi parte kompetente.

“Marobo iha poténsia boot ba área turizmu iha Bee-Manas Marobo, Borluli no Chibi, Govenru hahú halo buat balun, maibé ba prosesu manutensaun karik bele iha instituisaun mak bele tau matan ba fatin ne’e di’ak, iha komunidade hodi haree, maibé tanba komunidade la simu malu, entaun sira para tiha, tanba ladún organiza di’ak”, Prezidente Autoridade Munisípu Bobonaro ne’e ba jornalista sira iha kompleksu Marobo, postu administrativu Bobonaro, munisípiu Bobonaro, Sesta (07-08-2020).

Zeferino hateten, durante ne’e iha emprezáriu lokál balun mak tenta fó apoiu atu harii restorante no loja iha area refere, maibé proposta ne’ebé hato’o ba Ministériu Turízmu iha tinan 2017 to’o ohin loron seidauk hetan resposta.

Bee-Manas Marobo iha suku Ilatlaun, munisípiu Bobonaro konstrui no reabilita husi SEFOPE iha tinan 2015, ho orsamentu USD rihun 4 resin (USD498,860) ne’ebé inaugura iha loron 8, fulan Dezembru, tinan 2016, iha sestu Governu Konstituisionál nia mandatu.

Kompleksu Marobo, postu administrativu Bobonaro, munisípiu Bobonaro, iha suku tolu (3) hanesan Soilesu, Ilatlaun no Atu-Aben, ho totál uma-kain hamutuk 1001 no populasaun 4861, kompostu husi aldeia hitu (7). ida