JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Ramos Horta: Mandela apresia Maun Xanana nia lideransa bainhira hasoru malu iha Indonézia

Ramos Horta: Mandela apresia Maun Xanana nia lideransa bainhira hasoru malu iha Indonézia

Diplomata senior Timor-Leste, José Ramos Horta, deklara, eis Prezidente Repúblika, Áfrika Sul, Nelson Mandela, apresia teb-tebes  ho lideransa komandante Em Xefe Falintil iha tempu rezisténsia, Kay Rala Xanana Gusmão, bainhira hasoru malu ho Xanana iha komarka Cipinang, Indonézia.

Istória ne’e, eis Prezidente Repúblika, José Ramos Horta, hato’o hikas bainhira halo asaun karidade hamutuk ho Xanana Gusmão iha Suku Mane Haat, Postu Administrativu Laklubar, Munisípiu Manatuto, loron hirak liu ba iha fulan ne’e.

Laureadu nobel da paz 1996 ne’e, hatete, iha  momentu ne’eba nia hatene hela katak, Nelson Mandela sei vizita Indonézia, tanba ne’e Horta husu ba Nelson Mandela atu buka tempu hasoru Xanana Gusmão iha Komarka Cipinang, Jakarta, Indonézia no iha momentu ne’eba, Mandela hasoru malu duni ho líder máximu funu nian ba libertasaun nasionál Timor-Leste, Xanana Gusmão.

“Maun Bo’ot ema (Indonézia sira) kaer, ami halo kampaña mundial para buat ida, buat ida que perigozu teb-tebes katak, ita tenke garante que sira (Indonézia) la oho nia (Xanana) entaun tenke mobiliza presaun internasionál maka’as, entaun ema bar-barak delegasaun bo’ot sira ba Jakarta ne’e, hot-hotu tenke ba vizita Xanana iha Cipinang. Dala ida Ali Alatas (eis Ministru Negósiu Estranjeiru Indonézia) satiadu loos, nia hatete ba Jornalista balu, sira konta ba ha’u, agora sira hot-hotu to’o iha Jakarta, la mai koalia ho ha’u, hakarak ba koalia deit ho Xanana ‘povu sira basa liman kontente no haksolok’, mak ne’e deit”, dehan diplomata senior koñesidu iha mundial, Jose Ramos Horta.

Diplomata senior Timor-Leste Ramos Horta haktuir tan, uluk nia halo diplomasia iha rai-liur ba Estadu Unidu Amérika, ba tuku ema nia odamatan, dalaruma ema la loke, maibe tur pasiensia hodi hein ema loke odamatan hodi koalia kona-ba problema Timor ninian.

Nune’e mos líder karismátiku Kay Rala Xanana Gusmão mos haktuir, iha momentu ne’eba Soeharto la hatán Nelson Mandela atu hasoru nia, tanba Soeharto dehan Xanana kriminozu, maibe ikus mai sira na’in rua konsege hasoru malu duni.

“Mandela husu ba Soeharto atu hasoru ha’u, no Soeharto dehan  lae! Tanba Xanana la’ós prizioneiru polítiku, nia prizioneiru kriminozu, ne’e mak Mandela dehan nune’e, ha’u mos rejime iha ha’u nia rai (Áfrika Sul) dadur ha’u, sira la dehan ha’u prizioneiru polítiku, sira dehan ha’u kriminozu. Ne’ebé Mandela dehan ba Soeharto dehan hanesan ne’e, ha’u nu’udar kriminozu, ema barak mai vizita ha’u, tanba ne’e Soeharto tenke husik ha’u hasoru Xanana, Soeharto lian laiha ona be dehan ó bele hasoru nia”, dehan Kay Rala Xanana Gusmão, konta istória moruk sira momentu Indonéziu sulan nia iha komarka Cipinang.

Xanana hamutuk ho Ramos Horta inklui Timor-oan sira balu durante semana ida nia laran distribui nesesidade bázika ba komunidade kbiit laek no ema ho defisiénsia sira iha area kosta sul iha misaun prevensaun ba COVID-19. GMN

Lee hotu :   Projetu auto Estrada Suai, hamate ekonomia povu

Add to Comments Here!!!!

error: Content is protected.
Secured By miniOrange
You might also like:
PR sei reúne ho KE-KSDS kona-ba pedidu Governu ba renovasaun EE

Prezidente Repúblika (PR), Francisco Guterres Lú...

LH: To’o oras ne’e transferénsia públika ba RAEOA-ZEESM taka ba públiku

Peskizadora Organização Não Governamental (ONG) Lao...

Rezigna-an husi xefe negosiadór FM, Xanana: Lakohi servisu ho ema ne’ebé konesimentu Nol Besar

Líder nasionál Kay Rala Xanana Gusmão,...

Close