Xanana Gusmão: Uma-lisan mós kontribui hodi Timor-Leste manan funu

Durante vizita eis komandante em chefe FALINTIL, Kay Rala Xanana Gusmão no diplomata senior José Ramos Horta, iha postu administrativu Letefoho no Atsabe, konsidera, Maromak ho uma-lisan mak subar FALINTIL no povu husi inimigu, to’o Timor-Leste (TL) hetan ukun rasik-an.

Kay Rala Xanana Gusmão haktuir, nu’udár sarani nafatin fiar Maromak, maibé labele haluha kultura, lisan bei-ala sira-nia rasik, ne’ebé uluk kedas eziste.

“Sé ó hakarak manan funu, se ó komanda agora pelutaun ida, funu hasoru Indonézia sira, ó hakarak manan funu, naran ida José Alexandre ne’e soe tiha, ha’u dehan tanba sa? Kuandu o tiru malu, enfrenta problema iha tiru malu nini’an, ó bolu sira la koñese ó, tanba ida ne’e ha’u koñese ó nia avón no vizavón sira, ó hili ó Kay Rala ó Kay Olo, se ó lori nafatin José Alexandre ó mate. Ne’ebé tuir uma-lisan se ó hakarak manan funu, José Alexandre soe tiha, tanba la’ós ita-nia naran. Ne’ebé ha’u hili Kay Rala, nia haruka ha’u tuir nia ba, ita temi karik dehan katak, matak malirin uma adat boot ida, nia matak malirin mai-nia hú tiha ha’u nia ren-tós, nia dehan hahú ohin ó nia naran Kay Rala, ne’e hahú iha Fevereiru 1976”, Líder Nasionál ne’e konta ninia istória liga ho uma-lisan, Atsabe-Ermera, Sábadu (19-09-2020).

Eis komandante em chefe FALINTIL ne’e akresenta, iha uma-lisan mak ema hotu hatene respeita malu nu’udár Timor-Oan.

Tan ne’e líder nasionál ne’e husu ba joven sira, atu nafatin kaer-metin Timor nia hun no abut ne’ebé sempre fó matak malirin. san