Dom Virgílio: Sarani sira misa iha Ramelau hodi hasa’e devosaun ba Nain Feto

Arcebispo Arquidiocese Metropolitana Díli, Virgílio do Carmo, SDB, hatete, loron  Kuarta (07/10/2020) sarani Katólika selebra festa Nossa Senhora do Rosário ho misa iha Ramelau hun, nu’udar sinal agradesimentu ba Nain Feto nia tulun ba sarani hotu iha Timor-Leste (TL).

“Aban (ohin-red), selebra festa Nossa Senhora do Rosário nian, fatin Ramelau sai hanesan fatin ne’ebé sarani sira ba hodi hamanas sira nia devosaun ba Nain Feto, tan ne’e hahú ohin lorokraik (horseik lorokraik-red), ema hotu halibur hamutuk, iha Ramelau hun,” informa, Arcebispo Arquidiocese Metropolitana Díli, Dom Virgílio do Carmo da Silva SDB, liu husi konferénsia ba imprensa iha Lecidere-Díli, Tersa (06/10/2020).

Dom Virgílio hatutan, uma kreda sei hamutuk ho Governu, inklui lia-nain sira, hodi fó hanoin ba povu, nune’e mós foinsa’e sira ne’ebé ba vizita Nain Feto Ramelau, hakas-an hodi kuidadu ambiente Ramelau nian.

“Ba dala uluk sei hamutuk ho lia-nain sira, hodi hafoun fila-fali ita-nia komprimisu atu ema hotu ne’ebé ba vizita Nain Feto Ramelau, tenke respeita no hadomi ita nia ambiente, ita nia kostume hanaran tara bandu,” subliña, Arcebispo Metropolitana Díli ne’e. Cin