Kareta tula sasán sesta bázika baku fila iha Manatuto

Kareta tula sasán sesta bázika sai husi diresaun Díli  atu ba munisípiu Manatuto baku fila iha área Mane-Haat. Asidente tráfegu  ne’e akontese iha Tersa (01/12/2020) mais ou menus tuku 05:30 madrugada oras Timor-Leste.

Porta-Voz PNTL, Superintendente Xefe Arnaldo Araújo, esplika, kareta ne’e tula sasán sesta bázika husi Díli atu ba munisípiu Manatuto, maibé baku fila iha área Mane-Haat halo sasán sira ne’e namkari iha rai no rezulta ema na’in tolu kanek.

Kazu asidente tráfegu ne’e submete ona ba prosesu investigasaun.

“Iha tuku lima ho balun akontese asidénte tráfegu iha  Manatuto kareta fuso ne’ebé uza tula sasán sesta bázika baku fila, depois sasán sira ne’e monu hotu ba rai, kanek na’in tolu, oras ne’e dau-dauk Polísia Manatuto iha lokál akontesimentu hodi rekolla informasaun atu ita bele hatene saída mak estragu no kauza husi kareta ne’e baku fila. Kareta ne’e Governu aluga hodi tula sasán ba munisípiu Manatuto, maibé hetan dezastre iha área Mane-Haat”, Porta-Voz PNTL ne’e ba jornalista sira iha Kuartel Jerál PNTL, Caicoli-Díli.

Antes ne’e mós akontese abitante ida iha Lacluta munisípiu Viqueque, sunu sasán sesta bázika no Polísia kaptura ona suspeitu no detein  iha sela no sei aprezenta ba tribunál, hodi tuir Primeiru Interogatóriu. avi