Udan hapara diálogu PR Lú Olo ho povu Baucau

Relasiona ho vizita traballu ne’ebé Prezidente Repúblika (PR), Francisco Guterres “Lú Olo” hala’o ba munisípiu Baucau, durante loron rua, iha loron primeiru povu ho entuziasmu simu Xefe Estadu, maibé to’o Kinta, loron 17, fulan Dezembru, tinan 2020, diálogu ho PR Lú Olo la to’o oras termina ona, tanba udan no anin boot derepente, hapara tiha diálogu PR ho povu Baucau ne’e.

Tuir observasaun Jornalista GMN nian iha terenu nota, diálogu ne’ebé PR Lú Olo halo abertura ne’e iha tuku 09:30 to’o tuku11:36 oras Timor-Leste, situasaun la’o normal, tanba diálogu ho tema “Dada Lia ho Lú Olo bele rezolve ba problema ne’ebé de’it” no fó oportunidade ba povu no autoridade Baucau sira husu pergunta ba Xefe Estadu no membru Governu ba problema ne’ebe durante ne’e povu Baucau sira enfrenta.

Maibé iha tuku 11:37 hahú ona udan boot mai no iha tuku 11:41 udan hahú tun iha fatin diálogu, iha momentu ne’e udan mai halo diálogu PR nian sai fresku liu tan no mós halo komunidade sira entuziasmu hodi rona.

Hafoin ne’e, derepente tama iha tuku 11:58, mosu udan no anin boot, no Ministru Administrasaun Estatál (MAE) ne’ebé halo hela esplikasaun ba povu nia preokupasaun tenke taka sumbriña mak hatán, anin aumenta boot tan Governante ne’e tenke deside hakotu nia esplikasaun no entrega ba PR ajuda halo esplikasaun, maibé udan kontinua la fó fatin, hodi la fó biban ba membru Governu sira atu fó resposta ba preokupasaun povu Baucau.

To’o Xefe Estadu deside ensera diálogu refere, ho entrega ai-oan hamutuk 1000 ba administradór postu administrativu nen (6) iha munisípiu Baucau. oly