RAEOA livre ona halo viajen ba munisípiu seluk

Ministru Prezidénsia Konsellu Ministru (MPKM), Fidelis Manuel Leite Magalhães, hateten, Governu deside suspende cerca sanitária no premite fali dezlokasaun sidadaun sira iha Rejiaun Administrativa Espesiál Oe-Cusse Ambeno (RAEOA) ba munisípiu seluk, tanba la identifika transmisaun komunitária ba Corona Virus Disease 2019 (COVID-19).

Liu husi reuniaun Konsellu Ministru (KM) Governu aprova ona revogasaun rezolusaun Governu númeru 52/2020, loron 30, fulan Dezembru, nune’e aprova ona renovasaun impozisaun cerca sanitária iha RAEOA.

Dezisaun ne’e foti haree ba rekuperasaun husi ema hotu ne’ebé infeta COVID-19 iha RAEOA, tanba ne’e Governu deside ona atu suspende cerca sanitária no premite fali dezlokasaun sira liu husi terrestre no liu husi tasi entre rejiaun ne’ebé temi dau-daun ba munisípiu sira seluk.

“Ho ida ne’e cerca sanitária ba Oe-Cusse para ona ka kotu ona, entaun bele iha fali transporte viajen ba mai entre Oe-Cusse-Díli no munisípiu sira seluk, ida ne’e tanba na’in 3 iha Oe-Cusse rekupera ona no tuir Ministériu Saúde (MS) to’o agora seidauk deteta transmisaun komunitária”, MPKM ne’e iha Palásiu Governu, Sesta (15-01-2021).

Governante ne’e hateten, dau-daun ne’e Governu sei tau atensaun liu ba fronteira terrestre, nune’e bele asegura sidadaun sira iha RAEOA.

Enkuantu husi MS mós prepara ona planu hodi halo teste Swab ba komunidade sira iha RAEOA, nune’e bele halo identifikasaun no iha dadus serteza ba númeru COVID-19.

“Wainhira possivel sei halo teste Swab sira para iha serteza liu tan kona-bá númeru loloos moras nian, maibé ida ne’e la signifika Oe-Cusse sei nafatin ho cerca sanitária, teste sira ne’e MS sei halo, maibé povu Oe-Cusse livre halo viajen”, hakotu Fidelis. ida