GMN TV Saude e Educação Sentu Saúde Ainaro Vila falta fasilidade no eletrisidade

Sentu Saúde Ainaro Vila falta fasilidade no eletrisidade

0 views

Sentru Saúde Munisípiu Ainaro Vila, infrenta problema menus fasilidade médiku no eletrisidade.

Xefe Sentru Saúde Ainaro Vila, Arqueminho de Araújo, senti prokupa tebes ho situasaun  ne’ebé mak oras ne’e dadauk  sentru saúde ne’e infrenta, tanba alende menus pesoal saúde, fasilidade hanesan  kama ba inan  isin-rua partus, nomós kama baixa ba pasiente bai-bain aat hotu ona.

“Kondisaun real mak ne’e, ita bo’ot (jornalista) sira haree ho matan, ami iha ne’e infrenta problema barak tebes, mas atu halo nusa, kama ne’e ita simu  iha tinan 2000 liu ba, kuaze tinan sanolu resin ona, entaun to’o agora ita sei uja ida ne’e labele ona, alende kulsaun,   kolsa sumasu mós laiha hotu ona, tanba nakles hotu ona, tanba ne’e ita la uja,” relata Arqueminho de Araújo ba GMN, hafoin simu vizita Segundo Vise Ministru Saúde, Asuntu Planu Dezenvolvimentu Estratéjiku Saúde, Bonifácio Maucoli de Araújo, iha sentro saúde  Ainaro Villa, Kuarta (15/1/2019).

Arqueminho esklarese, nia hatene  kondisaun ekipamentus sira ne’e,  laserve ona atu tau iha sentru saúde, maibé kondisaun mak obriga  pesoal saúde sira nafatin tau hodi  pasiente sira bele uza.

“Ita hatene katak, kondisaun fasilidade sira ne’e la merese duni ona  para ita atu utiliza, maibé atu dehan oinsa kondisaun mak ne’e ona, hakarak lakohi ita sei tau iha ne’e, pois   hein foun mai. Karik vizita VMS ne’e  bele lori duni rezultadu di’ak mai ami”, katak Arqueminho.

Nune’e mós, Parteira Postu Saúde, Maula Hulo, Postu Administrativu, Hatubuliku, Alianca Ximenes da Conceicão, hateten, desde inísiu nia servisu iha Postu saúde refere, kuaje tinan hat ona, maibé la asesu ba eletrisidade.

“Ha’u iha ne’e problema barak, liu-liu mak  rekursus humanus, tanba iha ne’e ha’u mesak, karik ha’u ba tuir treinamentu ruma, postu ne’e tenki taka tanba ha’u mesak los, laiha  médiku, laiha enfermeiru laiha farmasista, no ida mós mak iha ne’e ha’u nia fatin mós kondisaun ladi’ak ona, odamatan mós aat, eletrisidade mós laiha”, katak Alianca Ximenes.

Hatan ba preokupasaun hirak ne’e, Segundo Vise Ministru Asuntu Planu Dezenvolvimentu Estratéjiku Saúde, Bonifácio Maucoli dos Reis, hateten,  nia ekipa alista hotu ona problema hirak ne’e,  nune’e sei tau iha prioridae bainhira Prezidente Repúblika, Francisco Guterres Lú-Olo promulga Orsamentu Jeral Estadu tinan 2019.

 “Ida ne’e mak ita-nia objetivu vizita, tanba ita hakarak haree diretamente kondisaun hotu-hotu ne’ebé mak pesoal saúde sira  infrenta, kuaze problema hotu ita haree ho matan, ita espera katak, ita-nia Prezidente Repúblika,  promulga orsamentu ne’e, ita bele sosa dada’uk ekipamentus sira ne’ebé mak  ita tenki sosa duni. Tanba ne’e ha’u mai ho  Diretur sira hotu atu sira bele haree rasik hodi foti kedas dadus saida mak tenki ta’u iha prioridade”, relata Bonifácio.

 Antes ne’e preokupasaun hanesan mós hato’o ona husi, pesoal saúde sira iha postu  saúde sira iha Postu Administrativu  Letefoho, nomos Atsabe Munisípiu Ermera.ola


Banner

Foto

Notisia Ikus

PM Taur husu sidadun hotu tenke kria paz durante kampaña eleitorál

January 17, 2022
Primeiru Ministru (PM) Taur Matan Ruak apela ba ...

Lú Olo Rekandidata–an ba Prezidente Repúblika

January 17, 2022
[caption id="attachment_58994" align="aligncenter"...

Eleisaun ba PR Sei Realiza iha Loron 19 Marsu

January 17, 2022
[caption id="attachment_58989" align="aligncenter"...

Ema na’in 10 hatudu prontidaun kandidata-an ba PR

January 16, 2022
[caption id="attachment_58967" align="aligncenter"...

Lere sei deklara ninia kandidatura ba PR iha Ainaro

January 15, 2022
Xefe Estadu Maiór Jenerál F-FDTL, Tenente Jene...
1 2 3 681

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker