Diretora Saude Munisípiu Díli, Agustinha da Costa Segurego Saldanha informa, total númeru moras dengue hahú husi fulan Janeiru to’o fulan Fevereiru tinan ne’e, hamutuk nain (80). Husi númeru ne’e nain hitu nolu resin sia (79) hetan tratamentu no fila ba uma, no na’in ida seluk labarik ki’ik oan ho idade tinan 5, la konsege salva nia vida, tanba hetan ona firus dengue.
Tanba ne’e, Saúde Munisípiu Díli (SMD), promete sei kontinua halo aktividade rega susuk dengue iha Suku no Aldeia hotu iha kapital Díli, hodi diminui moras dengue, tanba alende halo ema moras, dengue mós bele halakon ema nia vida.
“Relatóriu ne’ebé mai husi Sentru Saúde sira iha Munisípiu Díli nian, no mós husi klínika privadu sira ne’ebé mak ita iha husi númeru ne’e, nain ida labarik ki’ik oan ida mak ita labele salva, tanba nia hetan ona virus dengue, no nain 79 seluk ne’e hetan de’it tratamentu, depois fila”, informa Agustinha da Costa Segurego Saldanha ba GMN iha nia servisu fatin Bairo Formosa Díli, Kuarta (27/2/2019).
Agustinha esklarese, labarik ho idade tinan 5 ne’ebé mak hetan virus moras dengue no labele salva nia vida ne’e, hetan moras dengue Hermorajia, mai husi postu Administrativu Dom Aleixo, Aldeia 20 Setembru.
Tuir Dadus Saúde Munisípio Díli, maioria pasiente ne’ebé mak hetan moras dengue, maioria labarik ho idade tinan lima mai kraik.
“Maioria ema ne’ebé mak hetan moras dengue ne’e labarik ki’ik oan idade tinan lima mai kraik, iha mós ema bo’ot, maibé ladun, labarik ki’ik oan mak barak, no númeru moras dengue fulan kotuk ho fulan ida ne’e dok tebes, tanba iha fulan kotuk Munisípiu Díli ema nain 27, maibé iha fulan ida ne’e, nain 80 ita labele hatene, fulan nen ou tinan ida ne’e bele atinji hira”, Diretora ne’e preokupa.
Alende ne’e, Salvador Aleixo Amaral, Aman husi pasiente vítima moras dengue hateten, nia arepende ho moras ne’ebé mak nia oan hetan, tanba kondisaun fíziku nia oan nian tu’un maka’as, kompara ho moras sira seluk.
“Atu diminui moras dengue iha ami nia bairo, tanba ha’u nia oan mós sai ona vítima ba moras ida ne’e, ha’u senti trauma tebes, tanba ha’u nia oan nia kondisaun fíziku konsege tun maka’as maske, agora dadaun nia rekopera no alta ona mai uma, maibé seidauk di’ak los”, informa Salvador Aleixo.
Relasiona ho númeru moras dengue ne’ebé mak kontinua aumenta, Ministériu Saúde liu husi Saúde Munisípiu Díli, promete sei kontinua hala’o aktividade rega susuk iha kapital Díli, liu-liu Suku sira ne’ebé mak afetadu ho moras dengue hanesan, Suku Comoro, Kristu Rey, Nain Feto, Vera –Cruz no Atauro.ola
