Governu Timor-Leste ho Indonézia asina Memorandum of Understanding (MoU) ida atu servisu hamutuk hodi kontrola moras ne’ebé hada’et.
Diretora Jeral Prestasaun Servisu Saúde, Odete Viegas da Silva hateten, Governu liu husi Ministeriu Saédade (MS) asina MOU ho Ministériu Saúde Indonézia, atu halo kontrolu no foti medidas ba moras hada’et.
“Iha dokumentus rua ne’ebé mak ohin asina kooperasaun bilateral, kolaborasaun transfronteiras ne’e, ita atu haree liu ba moras ne’ebé mak bele hada’et, ita viajen ba Indonézia ou iha perbatasan, moras sira iha área ne’e, tenki iha kontrolu ne’ebé mak di’ak, atu nune’e moras iha Timor labele tama iha Indonézia, no Indonézia atu labele tama mai, oinsa mak parte rua foti medidas, ida ne’e ami tau iha asaun konkreta ba iha dokumentus ofisial rua ne’ebé mak asina”, dehan Odete ba Jornalista sira iha Hotel Timor Díli, Kuarta (20/02/109).
Odete haktuir, dokumentus planu asaun ne’ebé asina ne’e mós, kada diresaun, divisaun autonómo, halo mós vizíta ba iha parte relevante hanesan, Insitutu Nasional Saúde ba iha servisu hospitalares, atu haree mós parte Indonézia, kondisaun saida mak Timor-Leste iha, atu nune’e sai mós hanesan imput ida ba sira.
“Implementasaun la’o ona, ita haruka ema moras ba liur, no ami mós husu sei bele la’os de’it ita haruka moras ba de’it rai liur, maibé oinsa ekipa husi ne’eba bele mai haforsa fali ita-nia hospital atu nune’e, la presiza lakon ita-nia prestasaun ba sira, no sira mós bele kapasita ita-nia ema iha ita-nia hospital, atu nune’e bele transfere mós matenek, no ita-nia moras sira labele lakon oportunidade ida ne’e no seluk”, relata Odete.
Iha fatin hanesan, Direktur Pencegahan dan Pengendalian Penyakit, Anung Sugihantono akresenta, objetivu husi servisu hamutuk ne’e, Governu Timor-Leste haree katak, Timor-Leste ho Indonézia iha problema balun ne’ebé hanesan, liu-liu esforsu oinsa haree ba saúde populasaun sira nian.
“Indonézia iha esprensia oin-oin durante ne’e, sai hanesan responsabilidade, hodi fahe saida mak ami nia esprensia, atu Timor-Leste bele aproveita kondisaun ne’e, ba importansia Timor-Leste ninian ho másimu, hodi proteje saúde populasaun, liu liu Timor-oan sira nian”, relata Anung.oly
