Hafoin kumpri períodu inkubasaun durante loron 14, kompostu loron tolu (3) iha fatin izolamentu ba vírus corona Hospital Nacional Guido Valadares (HNGV), membru FALINTIL–Forsa Defeza Timor-Leste (F- FDTL) na’in rua (2) ne’ebé halo viajen husi Wuhan-Xina iha fulan Janeiru ne’e, fila-fali ba sira-nia rezidénsia no instituisaun F-FDTL, tanba la hatudu sintoma ruma ne’ebé deskonfia afeta vírus corona.
“Sira na’in 2 ami observa durante loron 3 iha ita-nia sala izolamentu, sira laiha sintoma ida hanesan isin-manas no selu-seluk tan, sira-nia saúde di’ak, han hemu di’ak no sira hetan atendimentu husi ita-nia médiku sira no pesoál saúde sira ne’ebé HNGV forma no pasiente na’in 2 ne’e alta tiha no ba uma iha semana kotuk, signifika sira laiha sinál ou sintoma ne’ebé liga ho vírus corona”, Xefe Departamentu Kontrolu Kualidade HNGV, Sara Maria Xavier ba jornalista sira iha ninia kna’ar fatin HNGV, Díli, Segunda (03-02-2020).
Sara esplika, hafoin izola provizóriu durante loron 3 (29-31/01/020) iha sala izolamentu no sura mós ho sira fila husi Wuhan-Xina mai Timor-Leste iha loron 17, fulan Janeiru ne’e, signifika sira kumpre ona períodu inkubasaun durante loron 14, nune’e iha loron 31, fulan Janeiru ne’e, HNGV entrega ona membru F-FDTL na’in 2 ne’e ba sira-nia família.
“Ita-nia forsa rua ne’e laiha sintoma isin-manas, ida ne’e signifika katak, la afeta vírus corona, sira-na’in 2 saúde di’ak, tanba ne’e, tenke entrega ba família sira, atu nune’e sira bele hala’o servisu hanesan bai-bain, importante mak kumpre ona sira-nia loron inkubasaun”, tenik Xefe Departamentu Kontrolu Kualidade HNGV ne’e.
Membru F-FDTL na’in 2 ne’e, fila husi Wuhan-Xina, iha loron 17, fulan Janeiru, tinan ne’e, tama iha sala izolamentu HNGV iha loron 29, fulan Janeiru no alta iha loron 31, fulan ne’ebé hanesan, tanba na’in 2 kumpre ona períodu inkubasaun durante loron 14, tuir rekezitu husi Organizasaun Mundiál Saúde. eni
