Diretur Ezekutivu Hospital Nacional Guido Valadares (HNGV), Aniceto Barreto, informa, moras dengue hamate tan labarik na’in rua iha HNGV.
Aniceto Barreto esklarese, matebian nain rua ho idade labarik ki’ik fulan 11 no 12 ne’e, husi pasiente nain 54 ne’ebé mak rejistu iha HNGV.
“HNGV simu moras dengue hamutuk kazu 54, ho idade labarik ki’ik oan mak barak liu, kuaze 75%, no 25% ne’e adultu sira. Husi númeru ne’ebé mak iha, rua ita la konsege salva, tanba mai ho kondisaun grave, no moras dengue ne’e ita klasifika ba tolu mak hanesan, dengue ho sinais alerta, ida ho kondisaun la alerta no ida mai ho kondisaun sok ou grave. Kondisaun grave ne’e hamutuk 42 ita salva, no rua ita la konsege salva”, relata Aniceto Barreto ba jornalista sira, liu husi konferensia ba imprensa iha HNGV, Sesta (1/3/2019).
Aniceto haktuir, oras ne’e dadaun moras ne’ebé mak rejistu aas iha HNGV mak moras dengue, tanba fulan rua de’it, (Janeiru to’o Fevereiru), HNGV rejistu ona kazu moras dengue hamutuk nain 54.
Preokupasaun hanesan mós, hato’o husi Xefe Sentru Saúde Becora, Adelina Pinto katak, hahú husi fulan Janeiru to’o Fevereiru, moras dengue konsege sai númeru bo’ot iha Sentru Saúde refere, tanba fulan rua ne’e rejistu ona ema nain 14, no husi númeru ne’e, maioria labarik ki’ik oan.
Bainhira husu kauza husi moras refere, Xefe Sentru Saúde ne’e hateten, moras dengue bele mosu tanba kauza husi udan ben ne’ebé mak nalihun iha roda, vazu aifunan no seluk tan, inklui ropa ne’ebé mak tara ou soe arbiru.
“Ho tempu udan ne’ebé mak oras ne’e dada’uk ita iha, ami mós rejistu kazu dengue hamutuk nain 14, ne’ebé ami konsege identifika katak, pozitivu hetan moras dengue”, relata Adelina Pinto.
Antes ne’e, diretora Saúde Munisípiu Díli, Paulina da Costa Saldanha Segurado mós esklarese, tuir dadus ne’ebé mak saúde Munisípiu Díli iha, total pasiente moras dengue durante fulan Janeiru t’oo Fevereiru, rejistu ona kazu moras dengue hamutuk nain 80, no husi númeru ne’e, labarik ida lakonsege salva, tanba tama hospital ho kondisaun hemorajia dengue.
Husi númeru kazu moras dengue ne’ebé mak HNGV no Saúde Munisípiu Díli hato’o, kazu vítima moras dengue ne’ebé mak mate hamutuk nain 3, husi númeru ne’e nain ida mate iha fulan Janeiru, no nain rua seluk mate iha fulan Fevereiru tinan ne’e.ola
