Espoza Prezidente Repúblika (PR), Cidália Lopes Nobre Mouzinho Guterres, hamutuk ho Gabinete Apoiu Atividade Cônjuge Prezidente Repúblika, halo asaun karidade ba klínika Bairo-Pité, hodi fó apoia ai-han ba pasiente má nutrisaun sira.
Espoza Prezidente Repúblika, Cidália Lopes Nobre Mouzinho Guterres, hateten, atividade ne’e hala’o hodi bele fasilita pasiente malnutrisaun atu konsumu ai-han ne’ebé di’ak no fó nutrisaun ba sira nia isin.
“Neste momento fó apoiu ba alin sira ne’ebé hetan má nutrisaun tanbá hetan pedidu husi departamentu nutrisaun nian katak alin sira ne’e presiza aihan no sasan atu uza durante tempu baixa hanesan popok, sabaun, fos, susu-ben ho buat ruma tan, sasan sira ne’e wainhira sira fila ba uma bele lori atu ba konsumo iha ne’ebá,” dehan, Cidália iha klínika Bairo-pite, Kinta (05/03/2020).
Cidália esplika, durante ne’e númeru má nutrisaun sa’e maka’as tanba komunidade seidauk iha koñesimentu konaba kauza husi moras refere, ho nune’e husu ba parte saúde hodi kontinua halo sosializasaun ba inan sira kona-bá oinsa prepara no identifika aihan ne’ebe saudavel.
Má nutrisaun ne’e, la’os afeta ba labarik kiik deit, maibe afeta mós ba ema bo’ot balun, ne’ebé laiha sitema imunidade diak ba sira nia isin no falta aihan ho nutrisuan hafoin ikus bele mós hetan moras má nutrisaun ne’e.
Iha fatin hanesan, Jestór klinika Bairo-pite, Inacio dos Santos apresia tebes ekipa husi espoza PR tanbá sai hanesan meius ida hodi apoiu servisu klínika nian ne’ebé durante ne’e hasoru hela problema krize finanseiru.
“Apresia tebes ba espoza Prezidente Repúblika tanbá fo ona apoiu ba alin malnutrisaun sira, tanbá ami durante ne’e akumula hela numeru malnutrisaun ne’ebé boot no depois de klinika hetan krize finanseiru, ami laiha orsamentu atu suporta aihan ba labarik má nutrisaun, kada loron ami hetan pasiente malnutrisaun bele to’o 3 ou 4, no balun mai ho kondisaun grave entaun ami buka solusaun liu husi husu apoiu ba sira ne’ebé bele ajuda”,hateten, Inacio.
Iha atividade karidade ne’e ekipa espoza prezidente repúblika fó apoiu sasan sira mak hanesan mina, fós, supermie, sabaun, inklui osan USD rihun ida.
Tuir estimasaun dadus husi klínika Bairo-pite, iha tinan 2019 konsege rejista ona pasiente malnutrisaun hamutuk 600 ne’ebé mairoia menoridade.
Dadauk ne’e iha pasiente na’in 8 ho moras má nutrisaun mak baixa hela iha klínika no husi númeru hirak ne’e iha pasiente balun ne’ebé sofre tan ho moras seluk hanesan HIV/SIDA no Tuberculoze.Ida
