Diretór Klínika Hospital Nasionál Guido Valadares (HNGV), Flavio Brandão, hatete to’o oras ne’e pessoal saúde voluntáriu, ne’ebé atu halo atendimentu ba COVID-19 seidauk iha uniforme ne’ebé difinitivu.
“Hau fiar katak, iha tempu badak bele hetan atensaun hosi Ministériu Saúde (MS), ba pesoal hirak ne’ebé atu halo atendimentu ba COVID-19”, dehan Diretór Klínika HNGV, Flavio Brandão, ba JN-Diário Sesta (20/03/2020) iha Bidau, Díli.
Diretór Klínika haktuir, presiza atensaun másimu no suporta ba pesoal sira, ne’ebé prontu ona atu halo servisu ba COVID-19, liu-liu uniforme ba sira tanba uniforme mós importante hodi prevene no falun pesoal nia isin ba moras hadaet ne’e.
“Agora dau-dauk pesoal voluntáriu sira uza sasan tuir padraun, ne’ebé HNGV iha hanesan kartaun no faru ne’ebé sira iha. Iha loron hirak liu ba, ami koalia ona konaba uniforme tuir padraun ne’ebé iha, tanba ne’e ami espera tenke iha duni uniforme ida difinitivu ba pesoal voluntáriu sira”afirma Flavio.
Nia haktuir, alende uniforme seidauk iha, HNGV mós enfrenta hela limitasaun eikpamentu vinteladór tuir kapasidade atu suporta pasiente kuandu iha pasiente ne’ebé kondisaun grave.
“Ita iha vinteladór 3 deit, ne’ebé oras ne’e uza hela iha sala ICU. Ha’u fiar katak ida ne’e sei kontinua uza, tanba ita iha rezerva 2 deit labele responde sekuadu iha COVID-19 maibé ho esforsu tomak hosi MS no ekipa task force iha tempu badak HNGV bele iha ona ekipamentu vinteladór ba fatin sira iha Tibar no sentru Formoza”.haktuir Flavio.
Flavio dehan, maske ekipamentu hanesan vinteladór no uniforme ba pesoal volunatariu sira seidauk iha no la sufsiente, maibé iha parte seluk HNGV iha ona ekipamentu tuir padraun hodi halo atendimentu ba COVID-19 inklui aimoruk balun iha ona.Fel
