Pesoal saúde Sentru Saúde Comoro (SSC) Díli, obrigadu tenki kalsu kama partu inan isin-rua nian ho lixu fatin, tanba kuaze kama partu sira iha SSC aat hotu ona.
Doutora Floriana da Silva preokupa tebes ho kondisaun ekipamentus refere, tanba maioria kama partu ba inan isin rua sira ne’ebe mak ladiak hotu ona, hodi prezudika médiku sira nia atendimentu ba komunidade sira.
Alende kama partu , ekipamentus seluk ne’ebé mak sai preokupasaun iha sentru saúde mak hanesan, warmer ou fatin hatoba bebe ne’ebé foin moris mós, aat ona nune’e, no durante ne’e sira kalsu de’it.
“Ita hotu hatene katak, sentru saúde Comoro ne’e la’os internamentu, maibé CSC nian ba observa pasiente de’it, maibé halo mós atendimentu ba inan partu sira ne’ebé lolos presiza kama, tanba kama ladun sifisiente ba pasiente sira, aat liu tan mak kama sira ne’e kuaje furujen hotu ona, at liu tan mak balun at ona, maibé kolega parteira sira kalsu ho lixu fatin hodi kontinua uza, tanba laiha kama seluk, nune’e mós warmer ba bebe sira, ida ne’e mós at ona sira kalsu mak uja”, hateten Floriana da Silva ba GMN iha nia servisu fatin Comoro Díli, Kinta (11/4/2019).
Floriana haktuir, problema falta ekipamentus, liu-liu kama ba inan sira partu no fatin bébe sira ne’e, lolos sai problema bo’ot ne’ebé ministériu saúde, tenki tau prioridade tanba bele fó impaktu negativu ba pasiente nia vida.
“Lolos ida ne’e prioridade ba ita-nia nai ulun sira, tanba kama ne’e atu uza hodi fó partu ba inan isin rua sira, no mós fatin ba bébe sira foin moris, ne’ebé kuandu kondisaun hanesan ne’e bebeik ne’e, bele fó impaktu negativu ba ema nia vida”, relata Floriana.
Antes ne’e, espoza Primeiru Ministru, Taur Matan Ruak, Isabel Fereira mós, preokupa kona ba kondisaun infra-esturtura nomós ekipamentus HNGV, tanba ladun konfortavel.
Tuir dadus, kada loron ida sentro saúde Comoro simu inan partu hamutuk hitu nulu to’o atus ida.ola
