Ministro Ensinu Superior Siênçias no Kultura, Longuinhos dos Santos afirma, tinan ne’e, atividade graduasaun husi universidade públiku no privadu hotu sei suspende, tamba surtu COVID-19 ne’ebé husi loron ba loron sempre aumenta.
“Entaun atividade hot-hotu letiva, ne’ebé maka iha ensinu superior tantu públiku ka privadu ne’e suspende, ne’e hatu’ur ona iha dekretu governu, no 3/2020 ba estabelismentu Estadu Emerjénsia, hatur iha artigu 28 hatur klaru iha ne’eba, nune’e atividade letivu hot-hotu tantu atividade graduasaun, ne’e mos ita suspende hotu durante iha Estadu Emerjénsia,”deklara, Longuinhos dos Santos, ba Jornalista sira, Kuarta(22/04/2020),iha Ministeiru Finanças Aitarak-Laran Díli.
Ministru ne’e hatutan, situasaun ne’ebé iha tanba virus corona, nune’e governu deside atu suspende hotu atividade aprendizajen hodi bele prevene-an husi virus refere.
“Atu informa ba ita bo’ot sira katak, ensinu superior ne’e iha ninia ambitu ne’ebé la hanesan ho ministeiru edukasaun joventude no desportu, ensinu superior ne’e iha ninia otonomo, liu-liu ba universidade tantu universidade públiku no mós universidade privadu sira, portantu situasaun ida ne’ebé ke Timor-Leste hasoru, ne’e situasaun ida ne’ebé ke ita hasoru COVID -19, portantu asuntu hirak ne’ebé maka governu halao,preokupa ne’e atu bele ses husi ameasa surtu COVID-19 nian,” tenik, Longuinhos.
Antes ne’e, Ministériu Ensinu Superior, hasai ona sirkular ida hodi suspende provizóriu atividade kalendáriu letivu, ne’ebé nessesita prezensa estudante sira nian.Jen
