Porta voz Sentru Intregradu Jestaun Krize, Rui Maria de Araújo hatete, motorista ho ajudante nain 2, ne’ebé tula sidadaun hirak ne’ebé konfirmadu pozitivu COVID-19 husi fronteira mota ain, mai iha fatin kuarentena Hotel Katuas, oras ne’e dadaun kumpri ona kuarentena Mota-ain, hodi hein sira nia teste.
“Autocaro ne’e mai ho ninia motorista ida, ho ninia ajudante nain 2,autocaru ne’e nia naran bintang, ninia xapa matrikula 37.811 TLS, ninia motorista nian naran Deolindo Perreira,hau husu lisensa ba nia atu hato’o ninia naran mós iha públiku, atu nune’e públiku bele tu’ur hakmatek labele rona boatus sira ne’ebé espalla,” deklara, Rui de Araújo ba Jornalista sira, iha Centru Convenções Dili (CCD), Tersa(14/04/2020).
Eis Primeiru Ministru no Ministru Saúde ne’e hatutan, ajudante bis nian nain 2 ne’e mós, oras ne’e dadaun iha ona kuarentena iha fronteira mota ain, hodi hein rezultadu teste.
“Motorista no ninia ajudante nain 2 ne’e agora dadaun iha kuarentena iha mota ain,ekipa laboratorium nia halo hela servisu atu foti mós sira nia sampel hodi halo analiza,ne’e signifika saida kazu konfirmadu hahu husi dia 10 mai to’o agora, ne’e kazu sira ita bolu ne’e klaster ka grupu ida deit, ne’ebé nia hun ne’e husi analiza ba kontaktus ne’ebé ekipa vizilansia halo, posivelmente nia hun ne’e husi ida, depois maka hadaet ba sira seluk”, dehan, Rui de Araújo.
Enkuantu ema ne’ebé iha kuarentena hamutuk 570, ema ne’ebé hein rezultadu teste hamutuk 34, diskonfia 178, nain 6 konfirmadu no husi nain 6 nain 1 rekopera ona.Jen
