Dadus Ministériu Saúde kona ba vasinanasaun COVID-19, iha Munisípiu Ermera, implementa tinan ida resin ona, maibé númeru sidadaun ne’ebé simu vasina seidauk atinji porsentu 80, iha ne’ebé vasina doze primeiru atinji porsentu 73.4, no doze daruak foin mak atinji porsentu 57.
Vise Ministru Saúde, Bonifácio Maucoli dos Reis, preokupadu ho partisipasaun sidadaun Ermera iha programa vasinasaun COVID-19 kontinua menus, kompara ho munisípiu sira seluk.
“ Infelizmente Ermera maka kobertura vasina kiik liu entre munisípiu sira seluk, ita seidauk atinji porsentu 80, ho persentajen ne’ebé kiik signifika katak, possibilidade boot para atu hetan dezastre ba iha virus ida ne’e, tanba ida ne’e maka nudar Ermera oan senti moe, li-liu Postu Hatolia ita senti moe teb tebes wainhira ema husi fatin fatin ninia kobertura sae, maibe ita ne’e to’o agora kontinua menus nafatin,”dehan Bonifácio Maucoli dos Reis iha kontinuasaun kampaña vasinasaun COVID-19, no lansamentu vasina Pfizer ba estudante sira, iha Postu Administrativu Hatolia B, Munisípiu Ermera, Sesta (01-04-2022).
Governante ne’e kontinua enkoraja, no akonsela komunidade atu hakat ba fasilidade saúde sira hodi simu vasina, tanba vasina maka dalan úniku, hodi hakotu pandemia ne’e.
“Ha’u husu ba maluk sira liu-liu ba alin estudante sira, ita boot sira nu’udar esudante hatutan informasaun ba ita-nia aman-inan sira, hodi hot-hotu mai simu vasina, tanba vasina ne’e importante tebes atu proteje ita hasa’e ita-nia imunidade hodi hasoru virus ida ne’e,”dehan.
Xefe Sentru Saúde Guisarudu (SSG), Maria Madalena Leto Mali, hatete, pesoál saúde sira durante ne’e hala’o ona vasina ba iha suku, ida ba suku ida iha Postu Hatolia B, ba premeira doze konsege atinji porsentu 73 liu, no doze daruak 57 liu.
“ Husi SSG nia area, ami konsege kobre hotu ona, no ami kontinua fo vasina booster ba komunidade no estudante sira ne’ebé simu vasina hamutuk ema 130, durante ne’e eskola hotu ami ba hotu ona hela Suku Urahou no Catrai leten mak seidauk,maibe ami sei koordena hamutuk ho edukasaun nune’e bele fo vasina ba estudante sira ne’ebé maka ida husi 12 to’o 17,” esplika.
Prezensa governante ne’e durante loron rua iha Suku Koliate, Postu Administrativu Hatolia A no B, sidadaun ne’ebé hakat ba simu vasina, 300, iha kampaña vasinasaun ne’e, hala’o mós tratamentu jerál ba komunidade.
Dadus Jerál, Ministériu Saúde, ba kobertura vasina COVID-19, iha teritóriu nasionál, ba doze dahuluk atinji ona porsentu 85.9, no doze daruak foin atinji porsentu 73.0.eni
