GMN TV Saude e Educação PM husu labarik sira tenki vasina

PM husu labarik sira tenki vasina

0 views

Primeiru Ministru (PM), Rui Maria de Araujo husu ba povu tomak tenki vasina labarik sira, atu proteje labarik sira husi moras.

Rui Araújo dehan vasina ne’e hanesan biru ida atu salva labarik sira nian saude di’ak iha futuru.

“Vasina hanesan biru (aimoruk, red) ne’ebe fo labarik sira, hodi moras tiru karik la tama, ida ne’e importante tebe-tebes, iha mundu laran tomak ema matenek nain sira halo peskiza sientifika, hatudu ona katak se ita  hakarak labarik sira nia futuru di’ak tenki vasina sira, tenki lori sira ba halo imunizasaun,” hatete PM Rui de Araújo, liu husi nia diskursu seremonia lansamentu semana imunizasaun mundial ne’ebe ho tema “hadomi ita nia oan, vasina sira ba” iha sentru saude Becora, Postu Administrativu Cristo Rei, Munisipiu Dili, Segunda (24/04).

Iha Timor-Leste kalendariu imunizasaun vasina ne’e dala lima molok labarik sira tinan ida, ho objetivu atu salva labarik atu labele hetan moras tetanus, mear (TBC), isin manas no seluk tan.

“Semana vasina ka imunizasaun mundial ne’e atu fo hanoin mai ita katak imunizasaun ka vasina importante tebe-tebes ba ita nia oan sira. Ba sira ne’ebe iha oan ona ne’e hatene, katak bainhira oan sira moras, inan ho aman ulun moras. Entaun vasina ne’e, forma ida atu halo labarik sira labele moras maka proteje labarik sira liu husi vasina,” hatete Xefi Governu ne’e.

Lori labarik sira ba hetan imunizasaun ka vasina ne’e la’os responsabilidade Ministeriu Saude nian deit no la’os Administrasaun Munisipal, lideres komunitariu sira deit, maibe inan aman ida-idak nian.

“Imunizasaun ida ne’e ita hotu tau iha hanoin, labele hein deit iha selebrasaun semana imunizasaun mundial ne’e mak foin lori oan sira ba vasina, vasina ne’e lor-loron, wainhira iha oportunidade tenki lori oan sira ba vasina, ba profisionais saude sira tenki organiza  estrutura hodi halo serbisu. Ha’u husu mós orariu ba imunizasaun la’os loron ida ka rua deit maibe imunizasaun tenki disponivel lor-loron ba ita nia komunidade sira atu hetan vasina,” Rui de Araujo hatete.

Rui de Araujo hatete tan, ba tinan 2017, TL selebra nia restaurasuan independensia ba dala 15 ( 20 Maiu 2002 to’o 20 Maiu 2017), ba Timor laran tomak hotu-hotu tenki garante labarik sira ne’ebe foin moris, sira ne’ebe kompleta ona tinan ida ho balun no tinan nen iha tinan ne’e (2017), tenki hetan vasina.

“Se ita halo ida ne’e ita hotu bele sente kontente katak vale a pena ita asume kargu iha diresaun i xefia, ita asumi responsabilidade hanesan profisionais saude no hanesan ema ne’ebe hamriik iha povu nia oin atu lori dezenvolvimentu ba povu,” hatete PM Rui.

Tipu vasina ka imunizasaun iha tolu, hanesan PCG, hepatitis no polio, tuir dadus husi Ministeriu Saude nian katak, iha tinan 2014 ba kraik sira ne’ebe mak hetan vasina ka imunizasaun kompletu, iha Timor laran tomak ne’e, atinji deit porsentu nen nulu (60%), maibe depois lansa programa saude iha familia, labarik ki’ik sira ne’ebe simu imunizasaun kompletu ne’e atinji ona 90 porsentu resin.

Primeiru Ministru lansa semana imunizasaun mundial iha Dili, liu-liu sentru saude Becora, maibé reprezenta ba Timor laran tomak mos ohin selebra ida ne’e no iha tinan oin iha loron hanesan 24 Abril sei kontinua selebra nafatin aniversariu ba loron semana imunizasaun ka vasina mundial ninian iha Timor-Leste.

Partisipa iha lansamentu semana imunizasaun mundial ne’e, husi Vice Ministra Saude, profisionais saude sira iha Munisipiu Dili nian, autoridade Munisipiu Dili hanesan Administrador, autoridade lokal sira reprezentante UNICEF nian iha Timor-Leste ho inan-aman sira ne’ebe lori labarik sira ba vasina iha loron refere.des


Banner

Foto

Notisia Ikus

ONU sei fó asisténsia ba ElPrez no ElPar

October 21, 2021
Reprezentante Organizasaun Nasaun Unida (ONU) se...

Kalendáriu audiénsia OJE 2022, Komisaun C aprova ona

October 21, 2021
Prezidente Komisaun C, ne’ebé trata asuntu fi...

Governu kontinua propoin PR renova EE da-19

October 21, 2021
Konsellu Ministru (KM) iha reuniaun Kuarta (20/1...

Movimentu livre iha finadu, Governu apela sidadaun “tenke” vasina

October 21, 2021
Ministru Prezidénsia Konsellu Ministru (MPKM), ...

MOP la realiza ninia promesa

October 20, 2021
Ministériu Obras Publikas (MOP), Diresaun Nasio...
1 2 3 653

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker