Ministériu Edukasaun Juventude no Desportu (MEJD) rekoñese profesores iha teritoriu tomak seidauk implementa programa Não Letivas atu hala'o atividade extrakurikulár ba estudante sira.
Asuntu ne'e deklara husi Ministra Edukasaun Juventude no Desportu (MEJD), Dulce de Jesus Soares, hafoin halo audensia ho komisaun G iha sala konferensia Parlamentu Nasionál (PN), Kuarta (29/05/2019).
Ministra Dulce de Jesus Soares hateten, profesores iha Munisipu 12 resin rua inklui Reziaun Administrativa Espesial Oe-Cusse Ambeno (RAEOA) no Zona Espesial Ekonomia Sosial Merkadu (ZEESM) hala'o no kupri ona sira nia knár tuir programa 'letivas' ho oras 26, maibe rekuiñe katak seidauk implemeta programa 'não letivas' aktividade extrakurikulár ba estudante sira ho oras 16.
Relasiona ho kestaun ne'e Ministériu Edukasaun Juventude no Desportu sei forma ekipa ida atu tun ba baze hodi kordena ho edukasaun Munisipius inklui RAEPA-ZEESM atu identifika kauza lolos.
"Ami halo diskusaun konabá situasaun edukasaun iha rai laran inklui RAEOA, Ministériu Edukasaun iha knár importante tebtebes atu kordena ho edukasaun iha munisipiu sira inklui RAEOA-ZEESM, tanba ne'e iha tempu Ministériu sei forma ekipa ida atu tun ba baze, tanba kuandu profesor sira la hanorin, ne'e afeita tebtebes kualidade eduaksaun ba povu ki'ik ninia oan sira. Tuir rejime kareira dosente ka profesores katak oras letivas iha 26, no iha oras 16 ba não letivas ka extrakurikular, e ida ne'e sai preokupasaun, maibe ita tenke haré husi fatór barak, liliu uma ba profesores, agua e saniamentu, no mos fatin ba sira atu han nian, e ida ne'e mak ita atu haré," hateten MEJD.
Iha sorin seluk prezidente komisaun 'G' Parlamentu Nasionál ne'ebé trata ba asuntu edukasaun, juventude, kultura no sidadania, Deputada Albina Marçal Freitas, haktuir durante fiskalizasaun ba iha terenu komisaun ne'e identifika problema sira mak hanesan, vensimentu ba profesores iha munisipiu sira liliu iha Oe-Cusse Ambeno.
"Koalia konabá fiskalizasaun ne'ebe mak ami hala'o iha Munisipius, hanesan povu nia matan no tilun, ami enkamina ona ba ministra, enkuantu Ministra deklara katak sei haruka nia ekipa ida ba iha RAEOA atu haré ketaun profesoresnian, e liliu vensimentu ne'e to'o agora seidauk iha solusaun," deputada Albina.
Audensia ne’ebe refere diriji husi Ministra Edukasaun Juventude no Desportu, Dulce de Jesus Soares ho mos prezidente komisaun 'G' parlamentu nasionál ne'ebe trata ba asuntu edukasaun, juventude, kultura no sidadania deputada, Albina Marçal Freitas no partipa husi ekipa dirijentes MEJD no membru komisaun 'G'. Ito
