Prezidenti Repúblika (PR), Francisco Guterres ‘Lú Olo’, kompremetidu atu solusiona problema ne’ebe klinika Bairo Pite infrenta, liu-liu kona-ba krizi finanseiru.
Klínika Bairo Pite hanesan Klínika privado ne’ebe harí iha tinan 1999 no durante ne’e fo asistênsia no tratamentu saúde ba komunidade ho gratuita.
Maibe, hahú husi 2018 to’o agora klínika Bairo Pite infrenta krizi finanseiru, ai-moruk no ekipamentus.
Atu solusiona problema nebe kilinka Bairo Pite, iha loron Segunda (27/05/2019) Doutor Daniel Murphy akompania mos husi jestór Klínika Bairo Pite Inaçio dos Santos, hala’o enkontru ho Prezidenti Repúblika Francisco Guterres Lú Olo, iha Palasio Prezidensial Nicolao Lobato, Bairo Pite - Dili.
Jestór Klínika Bairo Pite, Inaçio dos Santos hafoin enkontru ho Xefe Estadu, ba jornalista sira hatete Presidente Republika husu servisu nain sira iha klinika Bairo Pite atu kontinua servisu no parte Presidensia Republika sei buka solusaun ba problema ne’e.
“Prezidenti Repúblika husu ba ami servisu nafatin no sira sei buka solusaun,” dehan, Inaçio dos Santos.
Iha fatin hanesan mos, Doutor Klínika Bairo Pite, Daniel Murphy husu mos ba Xefe Estadu Francisco Guterres Lú Olo atu solusiona problema ne’ebe sira infrenta durante ne’e.
“Fahe informasaun kona-ba klinika Bairo Pite nian ne’ebe servisu barak ajuda povu Timor mais agora problema osamentu prezidenti promete atu buka solusaun, maibe seidauk, tanba ne’e ami tenke servisu nafatin no durante fulan tolu laiha orsamentu ba ema sira servisu iha klinika Bairo Pite,” dehan, Daniel Murphy.
Entretantu, Klínika Bairo Pite regista ona pasientes moras tubercloze (TBC) 165 nomós moras kankru leukemia (kankru rán) no nain rua konsege mate, tanba kestaun fasilidade.
Maske, to’o oras ne’e Klínika Bairo Pite hasoru problema Finanseiru, Ai-moruk no Ekipamentus, maibe nafatin kompremetidu ba públiku katak kilinika Bairo Pite sei la taka.Eus
