Reitór Universidade Nasionál Timor-Lorosa’e (UNTL), João Soares Martins, hatete, Governu presiza tau orsamentu boot ba Universidade Nasionál, nune’e bele hadi’ak di’ak liu-tan infraestrutura balun ne’ebé to’o agora seidauk hadi’ak.
Nia afirma, kuaze dékade rua ona, Universidade Nasionál ne’e sei hasoru dezafiu iha sala de aula ne’ebé limitadu atu akumula estudante sira.
“Ha’u halo ona komunikasaun ho Fakuldade Jestaun ne’e jestaun de sala a nível Fakuldade entaun Fakuldade sira mak tenke koalia di’ak ho professór sira oinsá sira halo distribuisaun orário de ensinu no mós haree disponibilidade de sala. Se ita haree jestaun ne’e ita sei la hasoru problema hanesan ne’e,” dehan Reitór UNTL, João Soares Martins, iha Díli, semana kotuk.
Reitór ne’e rekomenda atu iha Orsamentu Jerál Estadu (OJE) tinan oin, Governu no Parlamentu Nasionál tenke prevé ho montante ne’ebé boot, nune’e bele hadi’ak infraestrutura iha Universidade ne’e.
“Husu ba ita-nia deputadu sira atu bele iha vontade di’ak para aumenta tan orsamentu ba UNTL liu-liu iha kapitál dezenvolvimentu” tenik nia.
Durante ne’e, UNTL, iha Fakuldade ne’ebé akumula estudante barak iha sala aula mak Fakuldade Siénsia Sosiais, Edukasaun Arte no Umanidade no Fakuldade Direitu, maibé tuir padraun ideál ne’ebé iha, estudante sira tuir prosesu aprendizajem iha sala ida tenke akumula estudante 35.Ade
