Hospital Nasionál Guido Valadares (HNGV), selebra aniversariu ba dala 17 no mos Banco de Sangue halo tinan ba dala 16, maibé moras ne’ebé rejista aas iha Munisípiu Ainaro, suku Cassa moras Tuberculose (TBC).
Ho ida ne’e, doútor espesialista husi HNGV, halo konsulta massal no asaun karidade, durante loron 2 ba komunidade iha suku Cassa, Postu administrativu Ainaro, Munisípiu Ainaro.
Diretór Administrasaun Finansas no Lojistiku HNGV, Duarte Marsal Araújo hateten, iha tinan ida ne’e HNGV komemora nia aniversariu ba dala 17, ho ida ne’e familia bo’ot iha HNGV hanoin katak, lori HNGV hakbesik ba komunidade, atu nune’e komunidade sira bele sente tratamentu espesialista direitamente ne’e oinsa.
“Tuir informasaun ne’ebé mak ha’u simu husi doútor espesialista sira, durante loron 2 halo tratamentu iha suku Cassa, moras tuberkuloze mak ass liu, no mós moras ispa inklui mos moras estomuk,” informa, Diretór Administrasaun Finansas no Lojistiku HNGV, Duarte Marsal Araújo, iha Munisípiu Ainaro, Suku Cassa, Sabádu (27/06/2020).
Duarte Marsal esplika, Ita hatene katak HNGV nia funsaun hanesan Top referral, no nia simu referensi husi óspital 5, tamba ne’e, durante ne’e ami planu, tenki lori doútor espesialista sira hakbesik aan ba komunidade, no ida ne’e kada tinan ami lori doútor espesialista sira besik ba povu.
Diretor ne’e hatutan, husi saúde Munisípiu Ainaro, sira detekta katak komunidade barak mak sofre moras pulmão barak, ho ida ne’e ekipa ne’ebé dadaun ne’e halo tratamentu, rekomenda atu bele ba halo tratamentu iha nasionál.
“Antes atu mai halo tratamentu, ami servisu hamutuk ho autoridade lokal sira, fahe informasaun ba komunidade sira husi, Ainaro, Same no mós Suai atu bele mai halo tratamentu,”afirma, Duarte.
Duarte subliña liutan, tratamentu ida ne’e faze dahuluk, maibé halo tratamentu iha fatin 3, ekipa ida iha Ermera, Viqueque, no ekipa ida mak iha Ainaro Cassa, no tuir planu tinan selebra aniversariu HNGV sei ba fó, konsulta ba komunidade sira iha parte Leste.
Iha fatin hanesan, Xefi Suku Cassa, Longuinhos de Araújo sente orgullu, tamba HNGV selebra nia aniversariu ba dala 17, mai selebra iha suku Cassa fó konsulta ba komunidade sira.
“Ha’u agradese ba Ministeriu Saúde bele lori doútor espesialista sira mai halo konsulta masal, maibé la’os deit fó konsulta, sira espresa mós sentimentu solidariedade liu husi fahe nesesidade basiku, hanesan fós mina no supermi”, tenik, Longuinhos.
Xefi suku ne’e haktuir tan, iha suku Cassa iha aldeia 5, Boltama, Lalima, Kesamau, Sivil no Mausuka be’e moris, total xefi familia 993 no total populasaun hamutuk, 4653.
Nune’e mos, reprezentante komunidade suku Cassa, Francisca Orleans mos agradese ho prezensa husi doútor hirak ne’e, tamba bele fó konsulta ba komunidade sira ne’ebé mak durante ne’e presija.
“Ha’u mai konsulta moras estomuk, no matan, ho konsulta ida ne’e ami senti diak, no ami senti kontenti ida ne’e sorti ida mai ami, ami hakarak sira mai fó konsulta bebeik tamba ami menan mak konsulta ne’e deit,” afirma, Fransisca Orleans.Cin
