Governu Repúblika Popular Xina liu husi ninia Embaixadór iha Timor-Leste, Xiao Jianguo, Kinta (25/6/2020), entrega ekipamentu protesaun individual ba prevensaun COVID-19 ba instituisaun Falintil-Forsa Defeza Timor-Leste (F-FDTL).
Ekipamentu protesaun individuál ne’e, entrega diretamente hodi Embaixadór Xina iha Timor-Leste, Xiao Jianguo ba Ministru Defeza, Filomeno Paixão, iha Quartel Jenerál F-FDTL Fatuhada-Díli.
Mistru Defeza Filomeno Paixão, hateten, doasaun husi Repúblika Popular Xina mai Timor-Leste, la’os foin primeira vez, maibé dezde inísiu kedas Xina apoiu teb-tebes Timor-Leste nia luta to’o Timor-Leste hetan ninia independénsia.
“Repúblika popular Xina nian, liu husi Embaixador Xina nian iha ne’e mai iha oferese ba iha F-FDTL, oferese sasán mai para prevene COVID-19, sasán sira ne’e mai husi ro demora uitoan la’os hanesan nato'on ne’e mai ho aviaun, mai ho ro embora ita laiha ona kazu COVID-19, maibe ita bele hetan fali segunda ronda, ita bele hetan fali seluk, no medida em que iha ita nia viziñu NTT sei iha kazu, oferta sira fo mak ne’e maskara iha 26 mil, oklu no seluk tan. Ida ne'e jenerozidade husi Repúblika Popular Xina mai ita, la’os de'it ohin loron mak sira haree, maibe dezde 1975 to’o agora sira fó suporta ba ita-nia luta ba iha independensia no maka’as liu mak sira halo intervensaun iha ONU ne'eba to’o ohin loron ita bele hetan liberdade. Sira koerente nafatin ho sira nia pozisaun no to’o ohin loron iha susar sira mai nafatin ita, ne’e mak ita hatete, amigu ne'ebé na verdade, amigu ne’ebé iha susar laran”, dehan Mistru Defeza Filomeno Paixão, ba Jornalista sira liu husi konferensia ba imprensa, hafoin simu oferta husi Repúblika Popular Xina ne’e.
Iha diskursu Embaixadór Xina ba TL, Xiao Jianguo, fiar katak, ho apoiu ekipamentu protesaun individual ne’e bele ajuda membru F-FDTL sira hodi luta hasoru pandemia COVID -19 ho di’ak liu tan, no Xina prontu nafatin hametin kooperasaun bilateral entre nasaun rua ne’e.
“Doasaun ida ne’e ba nasaun Timor-Leste liu-liu ba F-FDTL atu halo protesaun hodi luta kontra pandemia COVID-19”,dehan Xiao Jianguo.
Serimonia entrega ekipamentu protesaun individual ne’e marka prezensa mos hosi Xefe Estadu Maior Jenerál F-FDTL, Major Jenerál Lere Anan Timur, Adidu militar Xina iha Timor-Leste, Koronél Huang Damin. GMN
