Xefe Departementu Bloku Operatóriu no Anestesia Hospital Nacional Guido Valadares (HNGV), Colombianus da Silva, hateten, situasaun Estadu Emerjénsia (EE) durante fulan tolu (3) ne’e, halo númeru operasaun iha HNGV tun ba 100 resin kada fulan, kompara ho tempu bain-bain.
Ho nune’e, hahú husi fulan Janeiru to’o fulan Juñu, tinan ne’e, Departementu Bloku Operatóriu no Anestesia halo operasaun ba pasiente hamutuk 1000 resin.
“Dadus jerál ba tinan kotuk kuaze 3 mill, iha primeiru semestre ne’e mil trezentus e tall, tanbá EE, entaun iha operasaun barak la’ós emerjénsia ita rai fali ba tempu seluk, durante ne’e haree de’it ba sira ne’ebé urjénsia tebes, kazu fulan ida kuaze 180 e tall no loron normal kuaze 300 kazu, kazu barak liu ba inan isin-rua partu labele, asidente ou trauma, infeksaun no tuir kazu ki’ik sira seluk, iha 3 mill ba tinan kotuk ne’e, operasaun ne’e na’in 2 de’it mak mate iha prosesu no ba tinan ida ne’e hanesan laiha liu”, Xefe Departementu Bloku Operatóriu no Anestesia HNGV ne’e ba GMN iha HNGV, Sesta (03-07-2020).
Colombianus husu ba komunidade hotu atu tau konfiansa nafatin ba pesoál saúde sira iha Timor-Leste, hodi fó tratamentu saúde.
“Komplain ou keixa ne’e normál, maibé sira la hatene dezafiu ne’ebé infrenta, sira mai buka atensaun ikus no ho kondisaun grave, nune’e ba komunidade tenke mai uluk tratamentu iha ospitál, labele ba buka tratamentu seluk, tanba mai ho kondisaun grave labele halo buat ida, tenke tau konfiansa ba doutor sira”, dehan nia.
Maske ho kondisaun pesoál saúde ne’ebé la to’o no ekipamentu ladún avansadu hanesan nasaun seluk, maibé konsege salva ona Timor-Oan barak nia vida, tanba hetan apoiu husi médiku estranjeiru no médiku Timor-Oan ne’ebé remata sira nia estudu iha nasaun seluk. ida
