Suplementu remuneratóriu ne’ebé Governu atu oferese ba pesoál saúde no pesoál saneamentu sira sei iha prosesu nia laran, tanba Governu sei buka hela solusaun.
“Ha’u relata ba PM kona-ba semana liu ba, enkontru fundu COVID-19 iha momentu Estadu Emerjénsia, iha sala situasaun no konsellu COVID nian, hodi jere aktividade hirak ne’e ho nia kabementu orsamentu,” dehan, Ministru Finansas, Fernando Hanjam, iha Palásiu Governu, Segunda (13/07/2020).
Governante ne’e subliña, relasiona ho suplementu remuneratoriu ne’ebé agora iha hela prosesu, Governu nia difikuldade ida, kona-ba sala situasaun desmantela ona.
Iha momentu sala situasaun sei estabelese, dokumentus kona-ba subsídiu hatama, ba sala situasaun depois de hetan aprovasaun husi SIJK hafoin lori mai sekretariadu no fim bele halo prosesu pagamentu.
“Maibé sala situasaun desmantela ona, hau halo diskusaun ho PM, maibé ita nia ekipa juridiku sei haree fali asuntu ne’e, tamba iha ligasaun ho buat legais hirak ne’e,” afirma Fernando.
Nia hatutan, suplementu ne’ebé seidauk halo pagamentu, husi saúde, agua no saneamentu, inklui balun husi ESTATAL, ida ne’e seidauk, maibé agora prosesu hela, atu iha loron ikus labele mosu buat ruma.
“tamba tenki hatene, se mak iha nivel Front Line, no se mak iha segundu tamba, ida ne’e sala situasaun mak tenki foti desizaun, maibé depois sala situasaun desmantela tia, tamba ne’e ohin hau lori mai PM hodi buka solusaun ida” tenik Ministru Finansas.Cin
