To’o agora Autoridade Inspesaun no Fiskalizasaun Atividade Ekonómika Sanitaria no Alimentar (AIFAESA), seida’uk iha laboratóriu rasik, nune’e difikulta AIFAESA nia servisu, atu halo teste ba produtu ne’ebé liu prazu.
Hafoin halo inspesaun no fiskalizasaun ba restaurante hirak ne’ebé eziste iha kapital Díli, Diretór Operasaun AIFAESA, Gabriel da Costa informa, to’o agora AIFAESA seida’uk iha laboratóriu rasik, atu halo teste ba produtu liu prazu no estragadu, nune’e difikulta tebes sira nia servisu.
Gabriel hatutan, durante ne’e AIFAESA serbisu hamutuk ho ministériu saúde no ministériu agrikultura, tanba ministériu rua ne’e iha laboratóriu rasik no bele garante kaulidade ai-han liu husi teste laboratóriu.
“Tamba laboratóriu importante tebes ba ita nia nasaun li-liu ita hanesan ita nia komunidade, ita nia konsumidor sira ita hotu konsumu produtu sira mai husi estranjeiru, tanba ne’e ita presiza tebes laboratóriu kuandu ita nia komunidade sira hetan difikuldade ruma kona-ba sasan produtu sira ne’ebé mak la dun satisfaz no deskonfia ruma ita tenke halo teste tanba ida ne’e, ita haree katak laboratóriu importante tebes garante kualidade ai-han sira, laiha laboratóriu difikulta tebes”, dehan, Diretór Operasaun AIFAESA, Gabriel Da Costa ba GMN, iha Farol Segunda (13/07).
Gabriel mos informa, iha tinan 2019 AIFAESA halo ona proposta ba Governu no hetan ona aprovasaun, maibé ikus mai Orsamentu Jeral Estadu la hetan aprovasaun iha Parlamentu Nasionál, nune’e proposta AIFAESA nian ne’e mos la realiza to’o agora, tamba osan laiha, maske nune’e sira esforsu nafatin, iha tinan oin sei halo tan proposta ba Governu.Ina
