Ministru Edukasaun Juventude no Desportu (MEJD), Armindo Maia, hatete MEJD sei reativa eskola hotu iha teritóriu Timor ho fazeadamente, tanba sei haree eskola sira ne’ebé priense ona rekezitu atu hala’o hikas prosesu aprendizajen.
“Atu reabertura eskola ida ne’e fazeadamente no la’os eskola hotu tenke abertura dala ida, no rekezitu sira ne’ebé presiza eskola sira priense mak hanesan, iha fasilidade saúde ijiene nian, uza máskara, distansia sosial inklui bee no sanitariu ne’ebé diak”, Armindo Maia, informa asuntu ne’e ba jornalista sira, Kuarta (01/07/2020), iha Palásiu Governu hafoin remata enkontru Konsellu Ministru.
Maske nune’e, governante ne’e la esplika detalla kona-ba bainhira mak atu reativa hikas prosesu aprendizajen ba kada eskola sira, ho razaun MEJD sei halo hela prosesu identifikasaun ba eskola sira.
Armindo haktuir, ekipa intregada ida kompostu hosi Ministéru Saúde (MS) no MEJD mak sei ba haree kondisaun kada eskola ne’ebé priense ona rekezitu atu hala’o hikas prosesu aprendizajen no eskola sira ne’ebé mak seidauk bele reativiva prosesu aprendizajen.
Iha okaziaun ne’e mos, MEJD ne'e informa, kona-ba atu realiza ezame segundu periodu ba estudante sira, Ministériu sei halo hela preparasaun, maske eskola balun realiza uluk ona ezame ba estudante sira no balun seidauk.
“Ita labele hanoin hanesan kondisaun normal, ne’ebé tenke reativa hotu eskola no realiza ezame dala ida, maibé tanba situasaun mak hanesan ne’e ami buka atu aselera no apela ba Diretór eskola no profesór sira hodi aselera lalais prosesu oinsa reativa eskola”, esplika Governante ne'e.
Maibe nia dehan, maneira ezame refere ME haruka ona profesór balun ba tuir ona formasaun, oinsa taka fali oras sira ne’ebé durante fulan 2 prosesu aprendizajen estudante la la’o, tanba Estadu Emerjénsia relasiona ho covid-19, nune’e bainhira iha ezame profesór sira bele uza maneira ne’ebé sira hetan iha formasaun bele aplika iha ezame. Fel
