Ministra Saúde (MS), Odete Maria Freitas Belo, husu Pesoál Saúde (PS) Hospital Nacional Guido Valadares (HNGV) aprezenta karta formal, hodi rezolve problema pagamentu suplementu renumeratóriu ne’ebé dau-dauk ne’e koresponde de’it ba loron 38.
“Ida ne’e sira nia direitu atu protesta, hanesan traballadór sira iha direitu, maibé dalan protesta ne’e la’ós husi Facebook ou whatsapp, MS importante mak tenke iha karta formál hodi hateten sira lakon loron servisu 1 ou 2, loron menus ou naran laiha, ne’e la problema bele halo karta no justifika no nia diretór asina ne’e haruka mai MS, ita nia komunikasuan sira ne’e tenke formál, sira liu husi Facebook, entaun hanesan superiór ita labele hatan”, dehan MS ne’e hafoin partisipa iha enkontru Konsellu Ministru (KM) iha Palaçio do Governo, Kuarta (08-07-2020).
Odete akresenta mós katak, ministériu halo pagamentu bazeia ba lista no pedidu ne’ebé hato’o husi Diresaun Ezekutivu HNGV, nune’e hodi bele justifika tenke iha karta formál.
“Konstituisaun fó dalan ba ema hotu, hodi hato’o nia preokupasaun no protesta, maibé labele impede servisu ospitál ni’an, atu nune’e, pasiente sira bele hetan nafatin atendimentu”, dehan nia.
Tuir rezoluzasun númeru 132020 ne’ebé aprova iha Konsellu Ministru (KM) ba Ministériu Saúde la halo konta ba pakote loron 60, hanesan PNTL no F-FDTL, maibé depende ba lista prezensa husi pesoál servisu ne’e rasik.
Antes ne’e, liu husi konferénsia imprensa Pesoál Saúde (PS) lubuk ida iha HNGV ameasa hapara aktividade servisu, wainhira la hetan konfirmasaun husi parte kompetente sira.
“Sura durante loron tolu ba oin mak ami la hetan resposta ka esplikasaun husi parte kompetente ba ami nia ezijénsia mak ami sei halo greve ka mogok kerja”, dehan Porta Voz, Mario da Graça.
PS hirak ne’e mós husu ba MS no Komisaun Funsaun Públika (KFP) atu bele fó fila-fali direitu ba feriadu loron 22, tanba haree ba prosesu pagamentu ne’e tuir koridór funsionalizmu públiku ni’an, la’ós ba situasaun espesiál Estadu Emerjénsia ni’an. ida
