Primeiru Ministru (PM), Taur Matan Ruak, hatete, Timor-Leste (TL) susesu livre ona husi COVID-19, tanba hetan apoiu husi parseiru dezenvolvimentu sira no povu. Maibe kuandu moras ne’e mosu fila-fali, TL tenke preparadu atu kombate.
“Moras ne’e fila-fali, ita prontu para hasai medida drástika hodi prepara-an fila-fali atu kombate moras ne’e”, dehan PM Taur, Tersa (28/7/2020), bainhira halo aprezentasaun relatóriu Estadu Emerjénsia durante fulan tolu ba Parlamentu Nasional (PN).
Iha aprezentasaun ne’e, Taur Matan Ruak, hateten, Estadu Emerjénsia la’os solusaun atu rezolve problema ne’ebé akontese, maibé Estadu Emerjénsia hanesan kondisaun ida atu Estadu preparadu hodi enfrenta problema ne’ebé akontese relasiona ho COVID-19.
Governante ne’e informa, durante implementasaun Estadu Emerjénsia, Governu hasoru difikuldade hanesan rekursu umanu, material, inklui rekursu finanseiru.
“EE la’ós solusaun ba Ita-nia problema sira, maibe EE hanesan kondisaun ida atu Estadu, Governu preparadu hodi reuni ita-nia kondisaun no kapasidade hotu ne’ebé ita-nia nasaun iha, hodi enfrenta problema ne’ebé ita hasoru durante Estadu Emerjénsia relasiona ho COVID-19. Ita bele dezeña katak ita-nia resposta ne’e di'ak tanba rezultadu di'ak, apesar difikuldade Sira ne’e hotu ita hatene hanesan rekursu umanu, materiais no rekursu finanseiru. Susesu ida ne’e la'os Timor-Leste ni'an mesak, maibe susesu ida ne’e koletivu, Governu, sosiedade sivil, parseiru dezenvolvimentu, hamutuk ho povu Timor-Leste, halo permisaun hodi ultrapasa situasaun Covid no minimiza impaktu Covid ni'an iha vida sidadaun. Maibe Hanesan Ita dehan katak, moras COVID iha Timor-Leste mak laiha, maibe moras ne’e la'o hela iha mundu tomak, kada vez numeru aumenta, mate aumenta ida ne’e la'os afeta de'it ba ema nia vida, maibe liu-liu ema nia ekonomia, ema barak lakon nia servisu, no dudu familia ba kiak liu tan”, dehan PM Taur.
Maske Timor-Leste livre ona husi COVID-19, maibe PM Taur kontinua alerta ba sidadaun hotu atu kumpre medida sanitáriu ne’ebé Ministériu Saúde fo sai hahú husi uza máskara, fase liman bei-beik, distansiamentu sosiál, atu nune’e bele ajuda proteje-an no família. Cin
