Timor-Leste Coalition for Education (TLCE), konsidera planu Ministériu Edukasaun Juventude no Desportu (MEJD), atu foti osan impréstimu konsensionáriu hosi Banko Mundial (BM) no Global Partnership Education (GPE), hamosu injustisa iha edukasaun Timor-Leste.
“MEJD dau-dauk ne’e finaliza ona projetu atu halo imprestimu ba Banku Mundial ho montante milliaun 15 hodi projetu BEST ((Basic Strengthening and Tranformation)) ba fortalesimentu no transformasaun edukasaun báziku, signifika atu halo modelu edukasaun hanesan sekulu XXI”,dehan Koordenadór TLCE, José Monteiro, liu hosi komunikadu ba imprensa Tersa (30/06/2020) iha Kaikoli, Díli.
Koordenadór TLCE haktuir, total orsamentu ne’ebé sei gasta ba projetu ne’e hamutuk millaun USD 23.5, milliaun USD 15 sei impresta hosi banko no millaun USD 8,5 hanesan apoiu hosi GPE tanba GPE hanesan doador ida ne’ebé durante ne’e apoiu ba MEJD.
“Dau-daun ne’e sira mai fali ho senariu foun katak, sira harak fó nafatin apoiu ba MEJD bainhira MEJD bele mobiliza fundu rasik, ne’ebé mak laos mai hosi Orsamentu Jeral Estadu (OJE), signifika bainhira MEJD atu hetan apoiu hosi doadores sira ho osan dolar 3 mak GPE sei aumenta dolar 1 tanba ida ne’e mak planu doadores sira halo hela agora”,afirma José Monteiro.
José subliña, ida ne’e halo MEJD hanoin difisil atu buka osan MEJD hanoin ona atu foti osan imprestimu 15 millaun hosi BM hodi hetan apoiu milliaun 8,5 hanesan doasaun hosi GPE no osan refere atu ezekuta ba projetu ida naran BEST, ne’ebé sei halo eskola sira ho envairmentu ho modelu sekulu XXI.
“Iha eskola laran iha arkondisionadu no iha projetor, enkuantu ita-nia nesesidade agora TL nian laos ida no iha planu dezenvolvimentu estratejiku mós la sita ida ne’e. Ita konkorda katak reforma edukasaun presiza no sistema edukasaun presiza atu eleva kualidade edukasaun maibé laos mehi atu realiza ida ne’e”.dehan tan.
Bainhira MEJD kontinua iha inisiativa hodi kontinua projetu BEST ne’e, mak MEJD sei to’o iha situasaun ida viola Konstituisaun RDTL artigu 59, ne’ebé Estadu fó biban no fó forsa ba governu atu kria edukasaun ne’ebé gratuitu obrigatoriu no universal, liu-liu ensinu baziku ba sidadaun hotu TL, hatutan Kordenadór TLCE.
“Bainhira projetu ne’e la’o MEJD debe ona BM nia osan millaun 15, ita sei tama iha sistema ida ema bolu privatizaun edukasaun no bainhira tama ona iha privatizaun edukasaun inan-aman sira tenke hasai oan barak liu atu selu sira nia oan ba eskola no ida ne’e sei halakon povu kiak nia sira nia direitu atu asesu ba edukasaun ne’ebé kualidade”.nia hatutan.
Tanba planu ida ne’e TLCE konsidera neon obskuratismu katak, governante no lideransa sira buka ignora vontade ema maioria nian hodi avansa ho vontade ema balun nian deit, ida ne’e destroi prinsipiu baze demokrasia nian katak, desizaun no polítika hotu ne’ebé atu foti no estabelese tenke garante nia transparansia no estabilidade.Fel
