Estudante Instituto Ciensia Saude nain lima nolu (50), oferta ran gratuitamente ba Hospital Nasional Guido Valadares (HNGV) liu husi Banco de Sangue hodi ajuda ba pasiente sira ne’ebé presiza ran.
Serafin Carceres, nu’udar estudante sente kontente oferta nia ran ba Banco de Sangue Hospital Nasional Guido Valadares tanba durante ne'e Banco de Sangue sempre infrenta menus ran.
"Ha’u fo ran ne'e tanba tuir moto BS nian katak ran turuk ida sei salva ema nia vida, ho prinsipio ida ne'e mak hau fo hau nia ran seim iha orbrigasaun husi ema ruma maibe ne'e hau nia hakarak duni atu fo ajuda ba maluk sira liu-liu pasiente sira ne’ebé mak presija ran, i oferta ida ne'e hau halo ho ha’u-nia konsiensia rasik,"Serafin Carceres hateten ba GMN iha ICS Comoro Sesta (10/8/2018).
Xefi Asuntu Akadémiku no Estudante ICS, Adelino Nuno da Conceicão, afirma atividade doasaun ran ne'e nu’udar atividade kontinuasaun doasaun ran ne’ebé parte rua BS no ICS hala’o durante ne'e tuir nota de intendementu ne’ebé mak parte rua halo iha tinan 2017 liu ba.
"Ida ne'e ami-nia atividade rutinidade ne’ebé mak ami hala’o durante ne'e, ne’ebé doasaun ran ne'e ami hala’o tinan -tinan dezde inisiu eskola ne'e harii ami sempre halo atividade hanesan ne'e, ami-nia estudante lima nulu mak prontu atu fo sira-nia ran lolos liu ida ne'e maibe tanba liña komunikasaun mak ladun diak entaun ami prepara mak nain 50," Xefi Asuntu akademiku ne'e afirma.
Entretantu Xefi Unidade Banco de Sangue, Gilberto Madeira, afirma objetivu husi doasaun ran ne'e alende tanba nudar atividade rutina ne’ebé Instituto Ciensia Saude ho Banco de Sangue halao liu husi nota de intendementu, objetivu seluk husi doasaun ran ne'e atu priense stock ran iha Banco de Sangue ne’ebé durante ne'e sempre menus.
"Ita boot sira hatene, durante ne'e ami sempre infrenta problema tanba ne'e atividade ida atu priense stock ran sira ne’ebé mak mamuk tanba ita nia pasiente barak mak durante ne'e mai presija ran maibe dala barak ita laiha ran i mesmu ran iha mos limitadu i ita depende liu ba familia,"Xefi unidade BS ne'e preokupa.
Tuir planu atividade doasaun ran iha instituto Ciensia Saude refere sei hala’o kada tinan ida dala tolu.Ola
