Pesoál Saúde iha Postu Saúde Maloa (PSM) husu ba Governu, liu husi Ministériu Saúde (MS) atu hasa’e PSM ba nivél Sentru Saúde, tanba durante ne’e postu refere fó atendimentu ba populasaun barak (liu nivél Postu Saúde ni’an).
“Ami iha PSM lokalidade iha suku Bairo Píte, ne’ebe akumula 26, ho populasaun besik rihun lima nulu (42.815), maibé loloos ne’e postu saúde refere hala’o atendimentu ba komunidade aldeia 19, maibé realidade hatudu katak komunidade husi aldeia 26 ne’e kuaze mai hala’o hotu tratamentu hotu iha postu refere“, Responsabel PSM, Luisa da Costa ba GMN iha ninia kna’ar fatin Bairo Píte, Sesta (07-08-2020).
Nia akresenta, maske ho rekursu umanu ne’ebé limitadu, maibé médiku ho pesoál saúde sira iha postu refere prontu fó nafatin atendimentu ba komunidade sira.
“Kona-bá rekursu umanu haree ba mós área ne’ebé mak boot, populasaun ne’ebé mak boot tebes, ho pesoál saúde ne’ebé limitadu, la signifika ami la halo atendimentu, maibé ami nafatin fó apoiu, serve nafatin populasaun ne’ebé de’it presiza ita-nia tulun”, tenik Luisa.
Hatán ba prekupasaun ne’e, Ministra Saúde, Odete Maria Freitas Belo, hateten, bainhira postu refere hala’o kobertura no fó asisténsia ba komunidade ho númeru ne’ebé boot, postu refere bele sa’e ba nivél Sentru Saúde.
“Sira propoin hela sira iha esperansa katak, postu saúde ne’e bele hasa’e nia nivél ba iha Sentru Saúde, agora ha’u hakarak haree sira-nia asisténsia saúde ne’ebé sira fó ema mai vizita barak ka lae,sira kobre aldeia hira, suku hira, bainhira kuandu sira-nia kobertura ne’e mak maka’as liu ona, entaun ita bele haree dehan hasa’e ba Sentru Saúde tenke aumenta tan rekursu umanu, depende ba sira-nia asisténsia ne’ebé sira kobre númeru komunidade ne’ebé asesu mai iha postu saúde ida ne’e”, tenik Governante ne’e.
Entretantu rekursu ne’ebé PSM iha mak médiku na’in 3, parteira na’in 2, enfermeira na’in 3, téknikaliadu 2, responsabel nutrisaun 1, cleaner 1 no ajuda husi voluntáriu sira. eni
