Sidadaun estranjeiru ida ne'ebé pozitivu Corona Virus Disease 2019 (COVID-19), iha sala izolamentu Vera Cruz dau-daun ne’e kondisaun saúde hahú rekopera ona, maibé pasiente seidauk bele sai husi sala izolamentu, tanba iha tan moras tensaun.
Koordenadora Jerál Komisaun Prevensaun COVID-19, Odete Viegas, hateten, felizmente pasiente ida ne'ebé deteta pozitivu COVID-19 laiha ona sintoma ruma, maibé pasiente ne'e sei mantein iha sala izolamentu, tanba sofre moras tensaun.
"Felizmente pasiente pozitivu COVID-19 ne'e nia hahú rekopera, maibé nia kontinua halo tratamentu ho ai-moruk tensaun ni'an, maibé sintoma ba COVID-19 laiha ona", Koordenadora Jerál Komisaun Prevensaun COVID-19 ne’e ba jornalista sira iha Laboratóriu Nasionál, Bidau-Díli, Segunda (10/08/2020).
Odete esplika, bainhira médiku sira lori pasiente ne'e ba iha izolamentu, pasiente ne'e mós sente hanesan ansiedade, maibé iha momentu ne'ebá médiku sira kontaktu kedas ho Embaixada Indonézia oinsá atu bele fó akonselamentu ba pasiente refere.
"Pasiente iha sala izolamentu nia laiha ona sintoma hanesan isin-manas, mear, purtantu ohin nia tama ona ba semana ida la hatudu sintoma", nia dehan.
Tanba ne'e, médiku sira haree hela ninia kondisaun, kuandu iha mudansa bele halo teste primeiru, bainhra hetan negativu sei kontinua repete tan ba teste segundu, kuandu hetan negativu dalarua negativu tenke hasai nia husi sala izolamentu.
"Ita espera pasiente ne'e ninia kondisaun mak hanesan ne'e nafatin to’o momentu nia rekopera, nune'e bele to’o nia sai", tenik Koordenadora Jerál Komisaun Prevensaun COVID-19 ne’e.
Husi sorin seluk, Ministra Saúde, Odete Maria Freitas Belo, hateten, sidadaun refere maske laiha sintoma, maibé sei presiza tan teste daruak, hodi bele halo konfirmasaun loloos katak, sidadaun Indonézia husi Java Sentrál ne’e livre oma husi COVID-19.
“Sim nia di’ak hela, laiha sintoma hein teste segunda virus ne’e sei pozitivu, teste ne’e ba dalarua, tenke teste ba dalatolu, primeiru mak ita kria kapasidade ita lori ba Darwin, mais agora dau-daun ita-nia mákina iha, prontu ita sei bele halo teste iha ne’e”, tenik Odete. eni
