Timor-Leste rejista tan kazu pozitivu COVID-19 foun ida hafoin iha Kuarta (19/8/2020) deklara livre husi pandémia mundiál. Sidadaun pozitivu ne’e estudante mane ida ho idade 25 ne’ebé iha loron 5, fulan ne’e, to’o Timor-Leste ho aviaun Citilink husi Bali, Indonézia.
Suspeitu durante ne’e iha kuarentena Farol. Ekipa Vijilánsia no Ekipa Laboratóriu Ministériu Saúde (MS) ni’an halo ona investigasaun no kolekta S-W-A-P husi sidadaun ne’e.
“Ita nia maluk ne’ebé mak moras dau-dauk ne’e mai ho aviaun Citilink ne’ebé mak aluga husi SEFOPE husi Korea mai, iha ne’eba mos iha pasajeiru balu husi Amérika ho ita-nia estudante sira balu. Ema ne’ebé mak detekta ho kazu pozitivu nia nasionalidade Timorense, hela fatin iha Díli, mane ho idade tinan 25”, dehan Ministra Saúde, Odete Maria Freitas Belo liu husi konferénsia ba imprensa iha Caicoli, Díli.
Rezultadu ne’ebé sai iha loron 19, fulan ne’e, hatudu pozitivu no agora dau-daun sidadaun ne’e iha ona fatin izolamentu Vera Cruz.
Dadus husi MS hatudu totál komulativu ezame laboratóriu durante ne’e hamutuk rihun lima atus ida haat nulu resin neen, komulativu negativu hamutuk rihun lima ualu nulu resin rua.
Alende ne’e, total ema iha kuarentena obrigatóriu hamutuk atus tolu lima nulu, auto kuarentena hamutuk atus ida rua nulu resin ualu no ema sira ne’ebé liu ona periódu kuarentena obrigatóriu hamutuk na’in rihun tolu atus lima haat nulu resin ida. rex
