Komunidade sira iha Munisípiu Ermera nia partisipasaun menus iha programa vasinasaun, tanba rona informasaun falsu ka hoax barak liu husi ema seluk.
“Iha preokupasaun barak mai husi ita-nia líder komunitáriu, sira preokupa liu mak iha Ermera ne’e, konsumu liu des informasaun sira, hoax ne’ebé mak sirkula, dehan katak kuandu ema vasina liu tiha tinan rua mate, nomós se mak simu vasina laiha oan, buat sira ne’e hotu mak sira ta’uk,”dehan Vise Ministru Saúde Bonifácio Maucoli, hafoin kampaña vasinasaun COVID-19 iha Sentru Saúde Guisarudu, Postu Administrativu Hatolia B, Munisípiu Ermera, Sábadu (13/08).
Xefe Suku Mau-Ubo, Domingos Noronha hatete, hafoin MS halo kampaña kona-ba imunizasaun, komunidade balun hahú hakbesik an ba postu saúde sira hotu hetan vasina.
“Foin lalais ne’e Ermera hetan Serka Sanitária ho Konfinamentu Obrigatóriu, entaun ne’e obriga tiha komunidade sira ba vasina, tanba ita hare dadaun ne’e iha sentru saúde loro-loron ema 100 resin, mak ba simu, signifika ida ne’e iha mudansa boot” tenik autoridade lokál ne’e.
Dadaun ne’e sentru saúde Guisarudu iha ona tarjetu rekoilla dadus, husi sentru saúde hamutuk 1.200, maibé sidadaun ne’ebé ba simu vasina 1638.
“Ami nia terjetu liu ona, maibé ami iha ne’e loro-loron ami fó vasina, dader komunidade mai hein tiha ona, agora ami la ba tuir ona” esplika Xefe SS Guisarudu Maria Madalena Mali.
Atualizasaun dadus vasinasaun husi MS hatudu, Munisípiu Ermera komunidade ne’ebé simu ona vasina doze dahuluk atinje ona 15,8%, no doze daruak foin atinje 2,7%.
Ba territóriu nasionál populasaun ne’ebé simu ona vasina doze dahuluk atinje ona 45,1%, no doze daruak foin atinje 16,9%.eni
